Երեկ՝ ադրբեջանական զինված ուժերի ագրեսիայի ֆոնին, ակտիվացել էին նաեւ ՀՀ-ում գործող «Յանդեքս» տաքսի ծառայությանը կեղծ պատվերներ ուղարկող ադրբեջանցիները: Բանն այն է, որ աշխարհի տարբեր կետերում ապրող ադրբեջանցիները, միավորվելով տելեգրամյան ալիքների տարբեր խմբերում, փորձել էին զանգվածային կեղծ պատվերների միջոցով կաթվածահար անել Երևան քաղաքի երթեւեկությունը:
Տեղեկությունը «Հայկական ժամանակի» հետ զրույցում հաստատեց նաև «Յանդեքս» տաքսի ծառայության տարածաշրջանային ղեկավար Ավետիս Գասպարյանը՝ նշելով, որ այդ հարձակումները որեւէ կերպ չեն ազդել ծառայության աշխատանքի վրա, քանի որ կանխվել են նախքան պատվերի ընդունումը:
«Երեկ իմացանք, որ ադրբեջանցիները պատրաստվում են Բաղրամյան պողոտայից դեպի «Զվարթնոց» օդանավակայան մեծ քանակի ավտոմեքենաներ պատվիրել եւ կաթվածահար անել երթեւեկությունը: Անմիջապես կիրառել ենք անվտանգային չափորոշիչները, և դրա արդյունքում ոչինչ տեղի չի ունեցել»,- ասաց Գասպարյանը:
Չցանկանալով շատ փակագծեր բացել՝ տաքսի ծառայության տարածաշրջանային ղեկավարը նկատեց՝ մի քանի հանգամանք կա, որոնց համադրումը բերում է այդ չափորոշիչների խստացմանը:
Նրա խոսքով՝ Ադրբեջանում «Յանդեքս» ծառայություն չկա, բայց, անկախ դրանից, նրանք այնտեղ էլ կարող են ներբեռնել հավելվածն ու կեղծ սկզբնակետ նշելով՝ պատվեր կատարել՝ մոլորեցնելով վարորդին. «Մյուս կողմից էլ, քանի որ «Յանդեքսը միջազգային հավելված է, և օգտվում են նաև այն ադրբեջանցիները, որոնք ապրում են աշխարհի տարբեր երկրներում»:
Ըստ Գասպարյանի՝ իրենց մեխանիզմների կիրառումն օգտագործվում է ոչ միայն Ադրբեջանից ստացվող պատվերները սահմանափակելուն, այլ աշխարհի տարբեր երկրներից:
Ամբողջությամբ կարդացեք armtimes.com կայքում։