Ժամանց
Լոնդոնում ցուցադրվում է աշխարհի ամենաթանկ նկարը
Լոնդոնի Թեյթ պատկերասրահում այսօրվանից ցուցադրվելու է աշխարհի ամենաթանկ նկարները` Պաբլո Պիկասոյի «Մերկ կինը` կիսանդրու և կանաչ տերևների ֆոնի վրա»: Այս մասին հաղորդում է France Presse գործակալությունը: Այն չի ցուցադրվել 1961թ.-ից ի վեր, իսկ Բրիտանիայում այն ընդհանրապես առաջին անգամ է ցուցադրվում:
Այդ նկարի գինը 106.5 մլն դոլար է, ընդ որում ցուցասրահում ներկայացված է միայն այդ նկարը: Պիկասոյի գլուխգործոցի սեփականատերը հայտնի չէ:
Տեղեկացնենք, որ այն վաճառվել էր Christie’s աճուրդների տանը 2010թ. մայիսին ամենաբարձր գնով, որը երբևէ վճարվել է արվեստի գործի համար:
Ժամանց
Հայաստանի կառավարությունը Սնուփ Դոգի համերգի համար հատկացրեց մոտ 6 մլն դոլար
Հայաստանի կառավարությունն ավելի քան 2 միլիարդ դրամ (մոտ 6 միլիոն դոլար) հատկացրեց աշխարհահռչակ ռեփեր Սնուփ Դոգի համերգը Երևանում կազմակերպելու համար։ Որոշումն ընդունվեց Հայաստանի կառավարության այսօրվա՝ օգոստոսի 11-ի նիստում։
Գործադիրը սահմանել է «Համաշխարհային աստղի հայաստանյան հյուրախաղեր» երաժշտական նախագծի իրականացման բովանդակային և ֆինանսական շրջանակը, շահառուների ներգրավման և մասնակցության պայմանները:
Նշվում է, որ ծրագրի նպատակն է աշխուժացնել մշակութային կյանքը, միջազգային ասպարեզում բարձրացնել Հայաստանի ճանաչելիությունը և զարգացնել մշակութային զբոսաշրջությունը։ Նախատեսվում է նաև ապահովել խոցելի և թիրախային խմբերի մասնակցությունը համերգին։
«Վերջին տարիներին առավել քան արդիական է դարձել Հայաստանում համաշխարհային աստղերի մասնակցությամբ համերգային լայնամասշտաբ ծրագրեր իրականացնելու հարցը, որը ոչ միայն կարող է նպաստել Հայաստանի ճանաչելիության և վարկանիշի բարձրացմանը, անվտանգ ու ժամանակակից երկրի դիրքավորմանը, մշակութային զբոսաշրջության շրջանակների ընդլայնմանը, այլև կարող է ապահովել երկրի տնտեսական աճը, բիզնես միջավայրի ձևավորման նոր հնարավորություններ ստեղծել:
«Համաշխարհային աստղի հայաստանյան հյուրախաղեր» երաժշտական նախագծի իրականացումը կնպաստի նաև Հայաստանի մշակութային կյանքի աշխուժացմանը»,-ասված է որոշման հիմնավորման մեջ: