Հասարակություն
Մի՛ շնչեք, Էրիկն է շրջափակվել…
Ֆեյսբուքում գրառում էր տարածվել մեքենայի տակ ընկած արնաքամ լինող փողոցային շնիկի մասին, դրամահավաք էին կազմակերպել տանջամահ լինող անօգնական կենդանուն վիրահատելու համար, ինչպես հաճախ, գրեթե ամենօրյա ռեժիմով լինում է ֆեյսբուքում: Սովորական բան է, արտառոց ոչինչ չկար:
Կենդանիներին օգնելու, կերակրելու, վիրահատելու, կյանքը փրկելու գրառումներ ֆեյսբուքում բազմաթիվ են, բազմաթիվ էին նաև պատերազմի օրերին, և դա նորմալ է: Եթե սահմանում պատերազմ է, Երևանում արնաքամ լինող կենդանու կողքով անտարբեր անցնելն օժանդակելո՞ւ է սահմանին գտնվող մեր զինվորին, որոնք, իդեպ, սահմանում կռվելուն զուգահեռ հոգ էին տանում նաև իրենց հետ դիրքում գտնվող շների և կատուների համար նույնպես:
Հիմա պարզվում է՝ դա նորմալ չէ, ավելին՝ շատ արտառոց է օգնել արնաքամ լինող անօգնական կենդանուն, երբ Էրիկը շրջափակված է:
Ֆեյսբուքում օգտատերերից մեկը գրառում է կատարել մեքենայի տակ ընկած, արնաքամ լինող շնիկի մասին, և դա դուր չի եկել հաղորդավար Էրիկ Անթառանյանին, իր խոսքով ասած` խելագարության հասցնելու պես մի բան է: Ինչպես կարելի է այդպիսի գրառում կատարել, երբ ինքը՝ Էրիկը շրջափակված է Արցախում: Երբ երկրում համավարակ էր, կարելի էր, պատերազմ էր, կարելի էր, երբ Էրիկը շրջափակման մեջ է, չի կարելի:
Իդեպ, Էրիկ Անթառանյանի ֆեյսբուքյան էջում չգտանք մի գրառում, որտեղ որևէ անդրադարձ լիներ Նիկոլ Փաշինյանի տիկնոջ՝ Աննա Հակոբյանի գրառումներին, որոնցից մեկում տիկինը անդրադարձել էր կատվի հետ գիրք կարդալու դժվարություններին, մյուսում՝ մոմի լույսերի և ծաղկի թերթիկների անհամադրելի համադրությամբ ֆուտբոլ էր վայելում: Այս ամենը` կատարված երկրի թիվ մեկ պատասխանատուի կնոջ կողմից, Էրիկին խելագարության չի հասցնում, իսկ մի քաղաքացու կողմից տանջամահ լինող կենդանու նկատմամբ խիղճը ահա խելագարվելու բան է։
Շատ հետաքրքիր է, թե ինչու Էրիկը չի անդրադառնում վարչապետի տիկնոջը, գուցե նա Հանրային հեռուստաընկերությունո՞ւմ է աշխատում: Եթե այո, ապա ոչ թե շատ հետաքրքիր է, թե ինչու չի անդրադառնում, այլ շատ պարզ է, թե ինչու չի անդրադառնում:
Բոլորին հորդորում ենք չփրկել ոչ մի վիրավոր կենդանու, նույնիսկ երբ արնաքամ է լինում ձեր աչքի առաջ, մի կերակրեք նաև ձեր ընտանի կենդանիներին, թողե՛ք սովամահ լինեն, դուք էլ մի սնվեք, և ընդհանրապես՝ մի՛ շնչեք, Էրիկն է շրջափակվել:
