Փաշինյան. Հայաստանի բազմազանությունը երկրի կարևոր արժեքներից է

Վարչապետ Նիկոլ Փաշինյանը ուղերձ է հղել Ազգային փոքրամասնությունների օրվա առիթով՝ շնորհավորելով Հայաստանի ազգային փոքրամասնությունների ներկայացուցիչներին։

Նրա խոսքով՝ ազգային և մշակութային բազմազանությունը Հայաստանի կարևոր արժեքներից է, իսկ երկրի տարբեր ազգությունների ներկայացուցիչներին միավորում է Հայաստանի Հանրապետության քաղաքացիությունը։

Փաշինյանը նշել է, որ պետությունը հանձնառու է պաշտպանելու յուրաքանչյուր քաղաքացու իրավունքներն ու ազատությունները, այդ թվում՝ ազգային ինքնությունը, մայրենի լեզուն, մշակույթը, ավանդույթներն ու կրոնական առանձնահատկությունները պահպանելու և զարգացնելու իրավունքը։

Վարչապետի ուղերձում ընդգծվում է նաև, որ ազգային փոքրամասնությունները դարեր շարունակ ներդրում են ունեցել Հայաստանի պատմության, մշակույթի և հասարակական կյանքի ձևավորման գործում։ Նրա խոսքով՝ այսօր ևս նրանք ակտիվորեն մասնակցում են երկրի հասարակական, տնտեսական, կրթական, մշակութային և համայնքային կյանքին։

Փաշինյանը կարևորել է բազմազանության նկատմամբ հարգանքը, հավասար հնարավորությունների ապահովումը, փոխադարձ վստահությունն ու հանդուրժողականությունը՝ դրանք համարելով ժողովրդավարական հասարակության հիմնասյուներ։ Նա նշել է, որ ազգային փոքրամասնությունների իրավունքների պաշտպանության և նրանց լիարժեք մասնակցության ապահովման ուղղությամբ աշխատանքը Հայաստանի պետության կարևոր առաջնահերթություններից է։

Վարչապետը հայտնել է, որ շարունակվելու են այնպիսի հասարակության ձևավորմանն ուղղված ջանքերը, որտեղ յուրաքանչյուր անձ կարող է ազատորեն պահպանել ու զարգացնել իր ազգային և մշակութային ինքնությունը՝ միաժամանակ մասնակցելով Հայաստանի ապագայի կերտմանը։ Նա ազգային փոքրամասնությունների ներկայացուցիչներին մաղթել է խաղաղություն, բարեկեցություն, հաջողություններ և նոր ձեռքբերումներ։

Աղբյուր՝ 168.am