«Պարտք են վերցնում, որպեսզի թոշակ ու աշխատավարձ վճարեն»

Ընտրություններից հետո Հայաստանի կառավարությունը ակտիվացրել է նոր վարկերի ներգրավումը։ Վերջին որոշմամբ համաձայնություն է տրվել Ֆրանսիայի զարգացման գործակալությունից 250 մլն եվրո՝ ավելի քան 280 մլն դոլար, ներգրավելու վարկային համաձայնագրին։ Գումարը նախատեսվում է ուղղել այս տարվա պետական բյուջեի պակասուրդի ֆինանսավորմանը։

Նյութում նշվում է, որ դրանից առաջ կառավարությունը Համաշխարհային բանկից ներգրավել է 200 մլն դոլար, Ասիական զարգացման բանկից՝ 150 մլն դոլար, իսկ այլ վարկային ծրագրերով՝ ևս շուրջ 100 մլն դոլար։ Նույն ֆրանսիական վարկային ծրագրի շրջանակում Ասիական զարգացման բանկի մասնակցությունը կարող է հասնել ևս 250 մլն դոլարի, ինչի դեպքում ներգրավվող միջոցների ծավալը կավելանա։

Նյութի հեղինակային գնահատմամբ՝ խոսքը նպատակային ենթակառուցվածքային ծրագրերի՝ ճանապարհների, ջրամբարների կամ գործարանների ֆինանսավորման մասին չէ։ Ներգրավվող միջոցներն օգտագործվելու են բյուջեի ընթացիկ ծախսերը կատարելու և պակասուրդը փակելու համար։ Կառավարության որոշման հիմնավորման մեջ նշվում է, որ վարկի ժամանակին ստացումը անհրաժեշտ է պետական բյուջեով նախատեսված ծախսերի ֆինանսավորումն ապահովելու համար։

Վարկի պայմանները ևս գնահատվում են որպես ծանր։ Նշվում է, որ տոկոսադրույքը գերազանցում է 5 տոկոսը, իսկ համաձայնագիրը ներառում է միանվագ գնահատման վճար՝ վարկի գումարի 0.5 տոկոսի չափով, տարեկան 0.5 տոկոս պարտավորության վճար՝ չմասհանված գումարի նկատմամբ, ինչպես նաև 0.5 տոկոսի կոմիսիոն վճար։ Ժամկետանց վճարումների դեպքում նախատեսվում է տվյալ ժամանակահատվածի տոկոսադրույքին հավելել 3.5 տոկոս սպրեդ։

Նյութում վարկային նոր ներգրավումները կապվում են պետական պարտքի սպասարկման ծախսերի աճի հետ։ Ըստ ներկայացված տվյալների՝ կառավարության պարտքի միջին կշռված տոկոսադրույքը գերազանցում է 7 տոկոսը, իսկ գանձապետական պարտատոմսերի տոկոսադրույքները դրանից բարձր են։ Հեղինակի գնահատմամբ՝ բյուջեի պակասուրդը և ընթացիկ ծախսերը պարտքով ֆինանսավորելը պարտքի կուտակման ամենավատ տարբերակներից է, քանի որ այդ պարտավորությունների բեռը տեղափոխվում է ապագա բյուջեների և սերունդների վրա։

Աղբյուր՝ 168.am