Եվրամիությունը պատրաստ է խորացնել գործընկերությունը Սիրիայի հետ և ակտիվացնել երկրի վերականգնմանն ուղղված մասնակցությունը, սակայն հետագա աջակցությունը կախված կլինի Դամասկոսի իրականացրած ներքին բարեփոխումներից։ Այս մասին երեքշաբթի Դամասկոսում հայտարարել է ԵՄ արտաքին քաղաքական ծառայության ղեկավար Կայա Կալլասը՝ Սիրիայի արտգործնախարար Ասադ աշ-Շիբանիի հետ համատեղ մամուլի ասուլիսում, հաղորդում է Ֆրանսպրեսը։

Կալլասի խոսքով՝ ԵՄ-ն պատրաստվում է օգտագործել իր քաղաքական և տնտեսական գործիքները՝ Սիրիային ներառական ու խաղաղ անցման ճանապարհին աջակցելու, ինչպես նաև երկիրն ավելի մեծ ներդրումներ ներգրավելու համար։ Նա, սակայն, ընդգծել է, որ այդ գործընթացի հաջողությունը մեծապես կախված է սիրիական կողմից։

ԵՄ արտաքին քաղաքական ծառայության ղեկավարն ասել է, որ ներդրումների համար անհրաժեշտ է վստահություն, իսկ դրա հիմքում պետք է լինեն անվտանգությունը, հստակ կանոնները, օրենքի գերակայությունն ու գործող պետական ինստիտուտները։ Նա Սիրիայի իշխանություններին կոչ է արել շարունակել պետական կառույցների և անվտանգության համակարգի բարեփոխումները։ Կալլասը անհրաժեշտ պայմանների թվում նշել է նաև կանանց հավասար մասնակցությունը հասարակական կյանքին, ազգային հաշտեցումն ու անցումային արդարադատությունը։ Նրա խոսքով՝ ԵՄ-ն պատրաստ է աջակցել Սիրիայի պետական ինստիտուտների ստեղծմանն ու ամրապնդմանը։

Կալլասը հայտնել է, որ ԵՄ-ն արդեն 620 միլիոն եվրո է հատկացրել Սիրիայի վերականգնման, հումանիտար կարիքների և պետական ինստիտուտների ամրապնդման համար։ Բաշար Ասադի տապալումից հետո՝ 2024 թվականի դեկտեմբերին, ԵՄ-ն չեղարկել է Սիրիայի դեմ տնտեսական պատժամիջոցները, իսկ 2026 թվականի մայիսին վերականգնել է Դամասկոսի հետ համագործակցության համաձայնագրի գործողությունը։

Աշ-Շիբանիի խոսքով՝ հանդիպման ընթացքում քննարկվել է գործընկերության նոր համաձայնագրի պատրաստումը, որը պետք է փոխարինի 1970-ականներին կնքված գործող փաստաթղթին։ Նա նշել է, որ այդ ուղղությամբ աշխատանքը կշարունակվի նաև հաջորդ տարի։

Սիրիայի արտգործնախարարը հայտնել է, որ Դամասկոսը եվրոպական երկրների հետ համագործակցում է անդրազգային հանցավորության, անօրինական միգրացիայի, թմրանյութերի ապօրինի շրջանառության և մարդկանց թրաֆիքինգի դեմ պայքարում։ Քննարկվել է նաև Սիրիայի առափնյա պահպանության կարողություններին աջակցելու հարցը։ Աշ-Շիբանին ընդգծել է, որ Սիրիայի անվտանգությունն անմիջականորեն կապված է Եվրոպայի անվտանգության հետ։

Աղբյուր՝ 168.am

«Աէրոֆլոտ»-ի Բանգկոկ-Մոսկվա SU273 չվերթն իրականացնող Boeing 777 ինքնաթիռը երեքշաբթի հարկադիր վայրէջք է կատարել Տաշքենդի օդանավակայանում։ РИА Новости-ին հայտնել է օդանավակայանի աշխատակիցը՝ պատճառը եղել է ուղևորներից մեկի վատ ինքնազգացողությունը։

Օդանավ են ուղարկել բժշկական բրիգադ, որից հետո Ռուսաստանի քաղաքացի ուղևորը դուրս է բերվել չվերթից։ Ինքնաթիռը Տաշքենդում վայրէջք է կատարել տեղական ժամանակով 17:38-ին։ Անհրաժեշտ օգնությունը ցուցաբերելուց հետո Boeing 777-ը վերսկսել է թռիչքը և 18:58-ին մեկնել Մոսկվա։

Աղբյուր՝ 168.am

ԱՄՆ նախագահ Դոնալդ Թրամփն աջակցել է Ռուսաստանի կողմից մի շարք քաղաքական բանտարկյալների ազատ արձակման դիմաց ամերիկյան պատժամիջոցների մեղմացման նախաձեռնությանը, հայտնում է The Atlantic-ը։ Պարբերականը նշում է, որ գաղափարը դեռ վաղ փուլում է և մինչ այժմ հրապարակայնորեն չի ներկայացվել։

The Atlantic-ի տվյալներով՝ մի քանի ամիս առաջ Թրամփի՝ Արևելյան Եվրոպայի հարցերով հատուկ բանագնաց Ջոն Քոուլը նախագահին առաջարկել է Մոսկվայի հետ հարաբերություններում կիրառել սառը պատերազմի տարիների դիվանագիտական գործարքները հիշեցնող մոտեցում։ Ըստ այդ սխեմայի՝ Ռուսաստանը պետք է ազատ արձակեր մի շարք քաղաքական բանտարկյալների, իսկ Վաշինգտոնը՝ դրա դիմաց մեղմացներ տնտեսական սահմանափակումները։

Նախաձեռնության հեղինակների գնահատմամբ՝ այս մեխանիզմը կարող էր ընդլայնել Ռուսաստանի հետ բանակցությունները՝ դրանք չսահմանափակելով միայն Ուկրաինայում պատերազմով, ինչպես նաև հիմք ստեղծել երկրի՝ համաշխարհային տնտեսություն աստիճանական վերադարձի համար։ Հեռանկարում Վաշինգտոնը կարող էր քննարկել Մոսկվայի հետ ռուսական նավթի, դիզելային վառելիքի, հազվագյուտ հողային մետաղների և այլ հումքային ապրանքների մատակարարումների շուրջ գործարքներ։

Պարբերականի փոխանցմամբ՝ քաղաքական բանտարկյալների ազատ արձակումը կարող էր նաև նպաստել Թրամփի՝ Խաղաղության Նոբելյան մրցանակ ստանալու ձգտմանը։

Միևնույն ժամանակ, Ռուսաստանի նկատմամբ պատժամիջոցների հնարավոր թուլացումը կարող է բացասական արձագանք առաջացնել Ուկրաինայում և ԱՄՆ-ի եվրոպական դաշնակիցների շրջանում։ Քննադատները մտահոգվում են, որ Մոսկվայի հետ տնտեսական գործարքները ռուսական պետությանը լրացուցիչ եկամուտներ կտրամադրեն Ուկրաինայում շարունակվող պատերազմի պայմաններում։

Նախաձեռնությունը քննարկվում է Վաշինգտոնի հակասական ազդակների ֆոնին։ Ավելի վաղ Թրամփը ստորագրել էր սենատոր Լինդսի Գրեհեմի մասնակցությամբ մշակված օրենքը, որը նախագահին լրացուցիչ լիազորություններ է տալիս Ռուսաստանի և նրա հետ առևտուր իրականացնող երկրների նկատմամբ խիստ պատժամիջոցներ սահմանելու համար։ Միաժամանակ, ըստ The Atlantic-ի, ամերիկացի ներկայացուցիչները փորձում են գտնել սահմանափակումների աստիճանական մեղմացման և Մոսկվայի հետ տնտեսական կապերի վերականգնման հնարավորություններ։

Աղբյուր՝ 168.am