Քաղաքականություն
Ռուսաստանի ռազմակայանի ապագան Հայաստանում կախված է ՌԴ-Թուրքիա հարաբերություններից․ «Հայացք Երևանից»
«Հայացք Երևանից» թերթում հրապարակված վերլուծական նյութում նշվում է, որ Հայաստանը չունի արտաքին և տարածաշրջանային քաղաքականության հստակ հայեցակարգ։ Ըստ հրապարակման՝ իշխանության հայտարարությունները՝ անկախության, ինքնիշխանության, Ռուսաստանից հեռանալու և ժողովրդավարական Արևմուտքին մերձենալու մասին, չեն ուղեկցվում երկարաժամկետ հաշվարկված գործողություններով։
Նյութում քննադատվում է նաև Թուրքիայի և Ադրբեջանի հետ ցանկացած գնով խաղաղություն հաստատելու մոտեցումը։ Հեղինակի գնահատմամբ՝ միայն Ռուսաստանին տարածաշրջանից հեռացնելը բավարար չէ այդ երկրների հետ կայուն հարաբերություններ ձևավորելու համար։
Հրապարակման մեջ անդրադարձ է կատարվում նաև 1994 թվականի իրադարձություններին։ Նշվում է, որ այդ ժամանակ հնարավոր էր չթույլատրել ռուսական զորքերի տեղակայումը Արցախում, սակայն համապատասխան որոշում չի կայացվել, ինչի հետևանքով Հայաստանը հայտնվել է Ռուսաստանի ազդեցության ներքո։
Եվրոպական ուղղության վերաբերյալ ևս նյութում ընդգծվում է, որ Հայաստանի քայլերը իրավիճակային են և չեն հիմնվում հստակ ռազմավարության վրա։ Հեղինակի կարծիքով՝ եվրոպական կողմին Հայաստանը հիմնականում հետաքրքրում է Ռուսաստանին տարածաշրջանից դուրս մղելու համատեքստում։
Ռուսաստանի՝ Հայաստանից իր ռազմակայանը դուրս բերելու հնարավորության մասին հրապարակման մեջ նշվում է, որ հարցը մեծապես կախված է ՌԴ-Թուրքիա հարաբերություններից։ Ըստ նյութի՝ Հայաստանի ազդեցությունն այդ գործընթացում սահմանափակ է, իսկ տարածաշրջանային հարցերը Ռուսաստանը սովորաբար լուծել է Թուրքիայի հետ փոխգործակցությամբ։
Հոդվածում անդրադարձ է կատարվում նաև Հայկական երկաթուղու կոնցեսիոն պայմանագրի հնարավոր խզման շուրջ ՔՊ-ական շրջանակներում շրջանառվող քննարկումներին։ Ըստ հրապարակման՝ Նիկոլ Փաշինյանը կարող է մտադիր լինել երկաթուղու կոնցեսիոն կառավարման իրավունքը փոխանցել թյուրքալեզու պետության, մասնավորապես՝ Ղազախստանին։ Միաժամանակ նշվում է, որ պայմանագրի դադարեցման դեպքում Ռուսաստանը կարող է պահանջել փոխհատուցել 2008 թվականից ի վեր ռուսական ընկերության կատարած ներդրումները։
Նյութը հրապարակվել է «Հայացք Երևանից» թերթի համարում։
Աղբյուր՝ aravot.am
