Հայաստանում ներդրումային միջավայրի վերաբերյալ իշխանության հայտարարությունները հակասում են բիզնեսի նկատմամբ իրականացվող քաղաքականությանը, պնդվում է հրապարակման մեջ։ Նյութի համաձայն՝ իշխանությունը մի կողմից արտասահմանյան ներդրողներին կոչ է անում ներդրումներ կատարել Հայաստանում, իսկ մյուս կողմից ճնշում է խոշոր բիզնեսին և միջամտում սեփականության հարաբերություններին։

Դուբայում անցկացված ներդրումային համաժողովում էկոնոմիկայի նախարար Գևորգ Պապոյանը հայտարարել էր, որ Հայաստանը կարող է ներդրումների համար գրավիչ ուղղությունից վերածվել ներդրումային հարթակի։ Սակայն հրապարակման հեղինակների գնահատմամբ՝ նման հայտարարությունները չեն կարող ներդրողներին վստահություն ներշնչել, եթե երկրում սեփականության իրավունքի պաշտպանությունը կախված է իշխանության որոշումներից։

Նյութում պնդվում է, որ Նիկոլ Փաշինյանն է որոշում՝ որ գործարարի նկատմամբ ինչ գործողություններ պետք է իրականացվեն, իսկ որոշ դեպքերում սեփականությունը բռնագրավվում է և կառավարման համար նշանակվում են կառավարության ներկայացուցիչներ։ Հեղինակները նաև նշում են, որ վերջին մեկ-երկու տարում արձանագրվել են բիզնեսների ամբողջական բռնագանձման և գործարարների նկատմամբ քաղաքական հաշվեհարդարի դեպքեր։

Հրապարակման համաձայն՝ քաղաքական որոշումներից հետո որոշ ընկերություններ հայտնվում են հարկային մարմինների ուշադրության կենտրոնում։ Հեղինակները հարց են բարձրացնում, թե ինչպես կարող էին տարիներ շարունակ գործող և նախկինում ստուգված ընկերություններում խոշոր հարկային խախտումները հայտնաբերվել միայն քաղաքական որոշումներից հետո։ Նրանց գնահատմամբ՝ նման գործելաոճը վախեցնում է ներդրողներին և նպաստում կապիտալի հեռացմանը։

Ներդրումային գրավչության մասին խոսելիս նյութում անդրադարձ է կատարվում նաև Հրազդանում չիպերի արտադրության գործարանի կառուցմանը։ Հեղինակների պնդմամբ՝ այդ ծրագիրը ոչ թե օտարերկրյա ներդրում է, այլ հայկական կապիտալով իրականացվող նախաձեռնություն, որի ֆինանսավորումն ապահովվել է հայկական բանկերից և կենսաթոշակային ֆոնդերից մեկից։ Նյութում նաև ենթադրվում է, որ ծրագրի շուրջ առկա են քաղաքական հաշվարկներ։

Հրապարակման հեղինակների համոզմամբ՝ ներդրողներին առաջին հերթին հետաքրքրում է ոչ թե միջազգային համաժողովներում հնչող հայտարարությունների բովանդակությունը, այլ այն, թե ինչ է տեղի ունենալու իրենց ներդրումների հետ Հայաստանում։ Նրանց գնահատմամբ՝ օրենքներով ներդրումների պաշտպանվածությունը հայտարարելը բավարար չէ. անհրաժեշտ է, որ այդ երաշխիքները գործեն նաև գործնականում։

Նյութում եզրակացվում է, որ Հայաստանը ներդրումային հարթակ չի կարող դառնալ միայն կառավարության ցանկությամբ։ Դրա համար, ըստ հեղինակների, անհրաժեշտ է ապահովել սեփականության իրավունքի պաշտպանություն՝ անկախ սեփականատիրոջ քաղաքական դիրքորոշումից, իշխանության հետ հարաբերություններից կամ հրապարակային գործունեությունից։

Աղբյուր՝ 168.am

Ռուսաստանի նախագահ Վլադիմիր Պուտինը հրամանագիր է ստորագրել, որով ֆիզիկական անձանց արգելվում է երկրից Եվրասիական տնտեսական միության երկրներ՝ Հայաստան, Բելառուս, Ղազախստան և Ղրղզստան, ինչպես նաև Ուզբեկստան, Տաջիկստան և Ադրբեջան, արտահանել 1 միլիոն ռուբլուց ավելի կանխիկ գումար։ Այդ մասին հայտնում է «Ազատություն» ռադիոկայանի ռուսական ծառայությունը։

Իրավաբանական անձանց և անհատ ձեռնարկատերերին նշված երկրներ ռուբլի արտահանելը ամբողջությամբ արգելվում է։ Ֆիզիկական անձանց համար նախկին սահմանաչափը 100 հազար դոլարին համարժեք ռուբլին էր՝ մոտ 8,5 միլիոն ռուբլի։

1 միլիոն ռուբլուց ավելի կանխիկ գումարը նշված երկրներ հնարավոր է տեղափոխել միայն միջազգային օդանավակայաններով՝ ներկայացնելով բանկային քաղվածքներ կամ գումարի ծագումը հաստատող այլ փաստաթղթեր։

2022 թվականի մարտից Ռուսաստանից մեկ անձի համար 10 հազար դոլարին համարժեք գումարը գերազանցող արտարժույթի արտահանումն արգելված է։ Միևնույն ժամանակ, Պուտինի հրամանագրում չնշված երկրներ կանխիկ ռուբլի կարելի է արտահանել նաև 1 միլիոնը գերազանցող չափով, եթե գումարը հայտարարագրված է։

Ռուսաստանի նախագահը նախօրեին մեկ այլ հրամանագիր էր ստորագրել, որով սահմանափակվում է վառելիքի և էներգետիկայի ոլորտի որոշ տվյալների հասանելիությունը։ Գաղտնի են դառնում նավթավերամշակման գործարաններում վառելիքի վերամշակման և արտադրության ծավալների, բենզինի ու դիզելային վառելիքի վաճառքի, ինչպես նաև դրանց տեղափոխման երթուղիների վերաբերյալ տեղեկությունները։ Փաստաթղթի համաձայն՝ այդ սահմանափակումները կիրառվում են ի պատասխան ԱՄՆ-ի, նրա դաշնակից պետությունների և միջազգային կազմակերպությունների գործողությունների։

Աղբյուր՝ aravot.am

Ֆլորենցիայի քաղաքային խորհուրդը «Կորպորասիոն Ամերիկա օդանավակայաններ» ընկերության հիմնադիր, ՀՀ ազգային հերոս Էդուարդ Էռնեկյանին է շնորհել քաղաքի բանալիները՝ «համերաշխության, խաղաղության եւ քաղաքացիական խիզախության արժեքների առաջմղման գործում ունեցած նշանակալի ավանդի համար»:

Այս մասին տեղեկացնում է «Արմենիա» միջազգային օդանավակայաններ» ընկերության մամուլի ծառայությունը։

«Էռնեկյանն Իտալիայի ու Արգենտինայի եւ, մասնավորապես, Ֆլորենցիայի հարաբերությունների կենդանի վկայությունն է: Նա շատ ներդրումներ է կատարել մեր քաղաքում, ինպես նաեւ՝ ամբողջ Իտալիայում՝ օդանավակայանների միջոցով, եւ նա այն արգենտինացի գործարարներից է, ով առավել ակտիվ է Եվրոպայում»,-ասել է Ֆլորենցիայի քաղաքապետ Դարիո Նարդելան:

Շնորհակալություն հայտնելով Էդուարդ Էռնեկյանն ասել է. «Քաղաքի բանալիները ստանալն ինձ համար մեծ իրադարձություն է, քանի որ գործարար մարդիկ բացում են դռները, ինտեգրում շուկաները, կապում մարդկանց, քաղաքներին, ազգերին արտադրության միջոցով՝ գնահատելով միայն այն ուժերը, որոնք են՝ հնարամտությունը, կազմակերպվածությունը, լավատեսությունն ու խիզախությունը, որով այս մշակույթը համակել է մեզ, ամբողջ աշխարհին»:

Քաղաքապետ Նարդելան ընդգծել է, որ Էռնեկյանին քաղաքի բանալիները շնորհելու առաջին պատճառը նրա՝ ցեղասպանության հիշատակի պահպանման հանձնառությունն է եղել. «Նրա արգենտինական եւ հայկական ծագումը եւ այն փաստը, որ նա ստեղծել է Ռաուլ Վալենբերգ հիմնադրամը, շատ կարեւոր խորհրդանիշ է մեզ համար»։

Միջոցառմանը ներկա էր նաեւ Իտալիայում ՀՀ դեսպան Ծովինար Համբարձումյանը, ով նշեց, որ Էդուարդ Էռնեկյանի ձեռքբերումների ներկապնակն ընդարձակ է. «Ցանկացած ներդրում եւ ծրագիր, որում ներառված է եղել Էռնեկյանը, հետապնդել է Հայաստանի եւ աշխարհի միջեւ կամուրջներ կառուցելու եւ ամրապնդելու հիմնական նպատակը»:

Banks.am