ՀՀ էկոնոմիկայի նախարար Գևորգ Պապոյանը սեպտեմբերի 29-ին այցելել է «Պռոշյանի կոնյակի գործարան» ՍՊԸ-ի Արտաշատի մթերման կետ՝ խաղողի մթերման ընթացքին ծանոթանալու և առկա խնդիրները տեղում քննարկելու նպատակով։ Նրան ուղեկցել է նախարարի տեղակալ Արման Խոջոյանը։

Էկոնոմիկայի նախարարության հաղորդմամբ՝ ընկերության բոլոր մասնաճյուղերում այս պահին մթերվել է շուրջ 13 հազար տոննա խաղող։ Մթերման սեզոնի ընթացքում նախատեսվում է ընդունել ավելի քան 32 հազար տոննա խաղող։

Գերատեսչության փոխանցմամբ՝ մթերումն իրականացվում է միջինը 140 դրամ մեկ կիլոգրամի դիմաց, իսկ օրական մթերվող խաղողի ծավալը կազմում է շուրջ 1 500 տոննա։

Այցի ընթացքում Գևորգ Պապոյանը ծանոթացել է գործընթացի կազմակերպմանը և արձանագրել, որ այն ընթանում է բնականոն ու կազմակերպված կերպով։

Աղբյուր՝ 168.am

Ռուսաստանի նախագահ Վլադիմիր Պուտինը հրամանագիր է ստորագրել, որով ֆիզիկական անձանց արգելվում է երկրից Եվրասիական տնտեսական միության երկրներ՝ Հայաստան, Բելառուս, Ղազախստան և Ղրղզստան, ինչպես նաև Ուզբեկստան, Տաջիկստան և Ադրբեջան, արտահանել 1 միլիոն ռուբլուց ավելի կանխիկ գումար։ Այդ մասին հայտնում է «Ազատություն» ռադիոկայանի ռուսական ծառայությունը։

Իրավաբանական անձանց և անհատ ձեռնարկատերերին նշված երկրներ ռուբլի արտահանելը ամբողջությամբ արգելվում է։ Ֆիզիկական անձանց համար նախկին սահմանաչափը 100 հազար դոլարին համարժեք ռուբլին էր՝ մոտ 8,5 միլիոն ռուբլի։

1 միլիոն ռուբլուց ավելի կանխիկ գումարը նշված երկրներ հնարավոր է տեղափոխել միայն միջազգային օդանավակայաններով՝ ներկայացնելով բանկային քաղվածքներ կամ գումարի ծագումը հաստատող այլ փաստաթղթեր։

2022 թվականի մարտից Ռուսաստանից մեկ անձի համար 10 հազար դոլարին համարժեք գումարը գերազանցող արտարժույթի արտահանումն արգելված է։ Միևնույն ժամանակ, Պուտինի հրամանագրում չնշված երկրներ կանխիկ ռուբլի կարելի է արտահանել նաև 1 միլիոնը գերազանցող չափով, եթե գումարը հայտարարագրված է։

Ռուսաստանի նախագահը նախօրեին մեկ այլ հրամանագիր էր ստորագրել, որով սահմանափակվում է վառելիքի և էներգետիկայի ոլորտի որոշ տվյալների հասանելիությունը։ Գաղտնի են դառնում նավթավերամշակման գործարաններում վառելիքի վերամշակման և արտադրության ծավալների, բենզինի ու դիզելային վառելիքի վաճառքի, ինչպես նաև դրանց տեղափոխման երթուղիների վերաբերյալ տեղեկությունները։ Փաստաթղթի համաձայն՝ այդ սահմանափակումները կիրառվում են ի պատասխան ԱՄՆ-ի, նրա դաշնակից պետությունների և միջազգային կազմակերպությունների գործողությունների։

Աղբյուր՝ aravot.am

Tesla-ն այս շաբաթ սկսում է Semi էլեկտրական բեռնատարների մատակարարումն առաջին խմբի հաճախորդներին։ Երկար հեռավորությունների բեռնափոխադրումների համար նախատեսված այս մոդելով ընկերությունն ընդլայնում է իր գործունեությունը՝ էլեկտրական սեդանների և ամենագնացների շուկայից անցնելով նաև առևտրային բեռնափոխադրումների ոլորտ։

Ընկերությունը չի հրապարակել բեռնատարների արտադրության ծավալներն ու գները, սակայն կրկին հայտարարել է, որ Նևադայի գործարանում նախատեսում է տարեկան արտադրել 50 հազար Semi։

Մատակարարումների մեկնարկին նվիրված միջոցառմանը մասնակցել են Tesla-ի խոշոր հաճախորդները՝ PepsiCo-ն, DHL-ը և US Foods-ը։ Նրանց տարբերանշաններով բեռնատարները ցուցադրվել են գործարանի տարածքում։

Semi-ն առաջին անգամ ներկայացվել է 2017 թվականին, իսկ արտադրության մեկնարկը նախատեսված էր 2019-ին։ Առաջին բեռնատարը զանգվածային արտադրության գծից դուրս է եկել այս տարվա ապրիլին, իսկ մեծածավալ արտադրության մեկնարկը նախատեսվում է 2026 թվականին։ Tesla-ն սահմանափակ քանակով Semi-ների մատակարարումները, այդ թվում՝ PepsiCo-ին, ԱՄՆ-ում սկսել էր դեռ 2022 թվականի վերջին։

Աղբյուր՝ 168.am