Տնտեսություն
ԵՄ-ն քննարկում է էներգակիրների գների աճը մեղմելու ժամանակավոր քայլեր
Եվրամիությունը պետք է սպառողներին պաշտպանելու միջոցներ ձեռնարկի էներգակիրների հնարավոր նոր թանկացումից՝ միաժամանակ շարունակելով նվազեցնել կախվածությունը հանածո վառելիքից։ Այս մասին Դուբլինում ԵՄ երկրների էներգետիկայի նախարարների հանդիպման ժամանակ հայտարարել է էներգետիկայի հարցերով եվրահանձնակատար Դան Յորգենսենը, հաղորդում է Euronews-ը։
Յորգենսենի խոսքով՝ ներկայում ԵՄ-ին էներգառեսուրսների անմիջական պակաս չի սպառնում, սակայն բարձր գները կարող են համադրելի սոցիալական հետևանքներ ունենալ։ Նա նշել է, որ Եվրոպայի գրեթե 50 միլիոն բնակիչ նույնիսկ սովորական ձմռանը չի կարողանում լիարժեք ջեռուցել իր տունը։
Եվրահանձնակատարը աջակցել է Ֆրանսիայի նախագահ Էմանուել Մակրոնի առաջարկին՝ ժամանակավորապես մեղմել նավթավերամշակման ոլորտի որոշ պահանջներ՝ դիզելային վառելիքի և այլ նավթամթերքների արտադրությունն ավելացնելու համար։ Միաժամանակ Միջազգային էներգետիկ գործակալության ղեկավար Ֆաթիհ Բիրոլը հայտարարել է, որ ռազմավարական պաշարներից նավթի նոր լայնածավալ բացթողումն առայժմ առաջնահերթ քայլ չէ։ Նրա տվյալներով՝ երկրներն արդեն օգտագործել են պաշարների մոտ 20 տոկոսը՝ պահպանելով շուրջ 80 տոկոսը։
Եվրահանձնաժողովը նախատեսում է նաև մեկ տարով հետաձգել ներմուծմանն առնչվող ԵՄ մեթանի պահանջների մի մասի կիրառումը։ Յորգենսենը շեշտել է, որ դա չի նշանակում հրաժարում կլիմայական նպատակներից, այլ կանոնների ժամանակավոր ճշգրտում՝ էներգետիկ շուկայի վրա ճնշումը նվազեցնելու նպատակով։
Երկարաժամկետ հեռանկարում Բրյուսելը մտադիր է արագացնել վերականգնվող էներգիայի աղբյուրներին անցումը, էլեկտրաֆիկացումը և էներգաարդյունավետության բարձրացումը։ Յորգենսենը ԵՄ երկրներին կոչ է արել ժամանակավոր աջակցության ծրագրերը չվերածել հանածո վառելիքի մշտական սուբսիդիաների։
Էլեկտրաէներգիայի արժեքը շարունակում է մնալ առանձին խնդիր։ Յորգենսենն ու Բիրոլը կոչ են արել վերանայել հարկային համակարգերը, որոնց հետևանքով էլեկտրաէներգիան երբեմն ավելի բարձր է հարկվում, քան գազը։ Նրանց գնահատմամբ՝ դա տնային տնտեսություններին և բիզնեսին խանգարում է գազից ու նավթից անցնել էլեկտրաէներգիայի։
Միևնույն ժամանակ Եվրահանձնաժողովը չի նախատեսում համաեվրոպական հարկ սահմանել էներգետիկ ընկերությունների գերշահույթների նկատմամբ՝ երկրներին թողնելով ԵՄ օրենսդրության շրջանակում ազգային միջոցներ կիրառելու հնարավորությունը։
Մտահոգության առարկա է նաև գազի պահեստարանների լցվածության մակարդակը։ ԵՄ գործող կանոններով այն պետք է կազմի 80 տոկոս։ Յորգենսենը երկրներին կոչ է արել ապահովել այդ ցուցանիշը՝ նախազգուշացնելով, որ էական հետ մնալու դեպքում մինչև գազի մղման հաջորդ սեզոնը պաշարները կարող են նվազել։
Աղբյուր՝ 168.am