Դատարանը հաստատել է ԼՂ-ից տեղահանված անձի ծննդյան գրանցման փաստը

ՀՀ Երևան քաղաքի առաջին ատյանի ընդհանուր իրավասության քաղաքացիական դատարանը բավարարել է Լեռնային Ղարաբաղից բռնի տեղահանված Զ. Մ.-ի դիմումը՝ հաստատելով նրա ծննդյան գրանցման փաստը։

Զ. Մ.-ն 2023 թվականի սեպտեմբերի 27-ին Ադրբեջանի ագրեսիայի հետևանքով բռնի տեղահանվել էր Լեռնային Ղարաբաղից և չէր կարողացել իր հետ վերցնել անհրաժեշտ փաստաթղթերը, այդ թվում՝ ծննդյան վկայականը։ Փաստաթղթի բացակայությունը խոչընդոտել էր Հայաստանի Հանրապետության քաղաքացիություն ստանալու և այլ իրավական գործընթացներ իրականացնելու հնարավորությանը։

2025 թվականի սեպտեմբերի 23-ին նա դիմել էր ՀՀ արդարադատության նախարարության Քաղաքացիական կացության ակտերի գրանցման գործակալություն՝ ծննդյան ակտային գրանցումը վերականգնելու խնդրանքով։ Սակայն հոկտեմբերի 7-ին դիմումը մերժվել էր՝ անհրաժեշտ փաստաթղթի բացակայության հիմքով։

Արտադատական կարգով հարցը լուծելու անհնարինության պատճառով Զ. Մ.-ն դիմել էր ՀՔԱ Վանաձորի գրասենյակին։ Կազմակերպությունը՝ ներկայացուցիչ Լիանա Մխոյանի միջոցով, 2026 թվականի մայիսից ստանձնել է նրա շահերի պաշտպանությունը։ Մայիսի 21-ին դատարան էր ներկայացվել դիմում՝ ծննդյան գրանցման փաստը որպես իրավաբանական նշանակություն ունեցող փաստ հաստատելու պահանջով։

Դատաքննության ընթացքում ուսումնասիրվել են ՔԿԱԳ գործակալության մերժման որոշումը և վկաների ցուցմունքները։ Դատարանը նշել է, որ Զ. Մ.-ն չի կարողացել անհրաժեշտ փաստաթուղթը ստանալ կամ վերականգնել արտադատական կարգով, իսկ ծննդյան գրանցման փաստի հաստատումն անհրաժեշտ է ՀՀ քաղաքացիություն ստանալու համար։ Դատարանը հաշվի է առել նաև այն հանգամանքը, որ փաստաթղթի բացակայությունը պայմանավորված է եղել Լեռնային Ղարաբաղից բռնի տեղահանությամբ։

Լիանա Մխոյանը դատարանում հայտնել է, որ Զ. Մ.-ն և նրա ընտանիքը դիմել են ՀՀ քաղաքացիություն ստանալու և բնակարանային ապահովման ծրագրից օգտվելու համար, սակայն ծննդյան գրանցման փաստի բացակայությունը խոչընդոտում է այդ գործընթացներին։

2026 թվականի սեպտեմբերի 29-ի վճռով դատարանը բավարարել է դիմումը և հաստատված համարել Զ. Մ.-ի ծննդյան գրանցման փաստը։ Վճիռը հրապարակման պահից հայտարարվել է օրինական ուժի մեջ մտած, քանի որ դրա ուժի մեջ մտնելու հետաձգումը կարող էր ծանր հետևանքներ առաջացնել դիմողի համար։

ՀՔԱ Վանաձորի գրասենյակը հայտնում է, որ շարունակում է Լեռնային Ղարաբաղից բռնի տեղահանված անձանց անվճար իրավաբանական աջակցություն տրամադրել։

Աղբյուր՝ aravot.am