Բնապահպան Սիլվա Ադամյանը հակադարձել է Ալիևի՝ Հայաստանի հասցեին հնչեցրած մեղադրանքներին

Բնապահպան Սիլվա Ադամյանը Aravot.am-ի հետ զրույցում անդրադարձել է Ադրբեջանի նախագահ Իլհամ Ալիևի՝ Հայաստանի հասցեին հնչեցրած բնապահպանական մեղադրանքներին։

Ալիևը հայտարարել էր, թե Քելբաջարի, Լաչինի և Զանգելանի շրջաններում հայկական կողմը ոչնչացրել, թալանել, հատել ու վաճառել է անտառային ֆոնդի 60 հազար հեկտարը։ Նա նաև պնդել էր, որ Երկրորդ ղարաբաղյան պատերազմից հետո այդ շրջանների անտառները հրկիզվել են՝ հայկական զինված ուժերի դուրսբերման ժամանակ։

Ալիևի խոսքով՝ Հայաստանի գործողությունները վնաս են հասցրել Արցախի անտառներին, այգիներին և գյուղատնտեսությանը, իսկ հայկական կողմը կիրառել է նաև ֆոսֆորային զենք։ Նա նշել էր, որ Ադրբեջանի հանքարդյունաբերության ոլորտի զարգացմանը խոչընդոտել են ինչպես օբյեկտիվ, այնպես էլ սուբյեկտիվ պատճառներ, այդ թվում՝ խորհրդային տարիներին հայտնաբերված հանքավայրերի՝ նախկինում օկուպացված տարածքներում գտնվելը։

Սիլվա Ադամյանը, հակադարձելով այդ հայտարարություններին, ասել է, որ Ադրբեջանը լուրջ բնապահպանական խնդիրների առաջ է կանգնած։ Նրա խոսքով՝ Կասպից ծովի ադրբեջանական առափնյա հատվածը զգալիորեն վնասվել է, իսկ որոշ տարածքներ նավթով և նավթամթերքով այնքան են աղտոտված, որ մարդիկ չեն կարողանում մոտենալ դրանց։ Բնապահպանը նշել է, որ վտանգված են նաև Ռուսաստանն ու Ղազախստանը, իսկ Ապշերոնի թերակղզում առկա են նավթամթերքի արտանետումներից առաջացած խնդիրներ։

Ադամյանի պնդմամբ՝ Ադրբեջանի ներսում ևս հանքերի շահագործումը բացասական հետևանքներ է առաջացնում։ Նա նշել է, որ վերջերս երկրում հանքի շահագործման դեմ բողոքի ակցիաներ են տեղի ունեցել, որոնք, ըստ նրա, իշխանությունները զենքի և զորքի կիրառմամբ են ճնշել։

Բնապահպանը հայտարարել է, որ Ալիևի մեղադրանքներին հայկական կողմը հակադարձելու է։ Նրա խոսքով՝ Արցախում տեղի ունեցածը միայն պատերազմ չէր, այլ ամբողջ էթնիկ ժողովրդի տարածքի ոչնչացում։

Աղբյուր՝ aravot.am