Զելենսկի․ Գերմանիայի հետ համաձայնագրերի ընդհանուր արժեքը գերազանցում է 8.5 միլիարդ եվրոն

Ուկրաինայի նախագահ Վլադիմիր Զելենսկին հայտնել է, որ Գերմանիայի կանցլեր Ֆրիդրիխ Մերցի հետ հանդիպման ընթացքում ձեռք է բերվել Ուկրաինային ավելի քան 1.3 միլիարդ եվրոյի աջակցության նոր փաթեթի պայմանավորվածություն։ Նրա խոսքով՝ փաթեթը ներառում է ինչպես անհետաձգելի ռազմական օգնություն, այնպես էլ ձմռանն ընդառաջ Ուկրաինայի էներգետիկ ոլորտին տրամադրվող աջակցություն։

Զելենսկին նշել է, որ քննարկվել է նաև օդային պաշտպանության միջոցների անհրաժեշտությունը։ Նրա տեղեկացմամբ՝ հանդիպման ընթացքում ստորագրվել կամ ընդունվել է 15 համաձայնագիր և փաստաթուղթ, որոնց մեծ մասը վերաբերում է անվտանգությանը, արտադրությանը, համապատասխան գնումներին, գերմանական արդյունաբերության համար ուկրաինական պատվերներին և Ուկրաինայում համատեղ նախագծերին։

Ուկրաինայի նախագահի խոսքով՝ այդ համաձայնագրերի ընդհանուր արժեքը գերազանցում է 8.5 միլիարդ եվրոն։ Նա նաև հայտնել է, որ ստորագրվել է առանձին համաձայնագիր, որը նոր հնարավորություններ է ստեղծում համատեղ հակադրոնային պայքարի համար։ Զելենսկին շնորհակալություն է հայտնել Գերմանիային, Ֆրիդրիխ Մերցին և ամբողջ Եվրոպային՝ Ուկրաինային աջակցելու համար։

Աղբյուր՝ 168.am