Իրանական գեներալը զգուշացրել է ԱՄՆ-ին ցամաքային գործողություն սկսելու հետևանքների մասին

Իսլամական հեղափոխության պահապանների կորպուսի «Ղուդս» ուժերի համակարգման հարցերով հրամանատարի տեղակալ, բրիգադի գեներալ Իրաջ Մասջեդին հայտարարել է, որ ԱՄՆ-ն պարտություն կկրի, եթե ցամաքային ներխուժում իրականացնի Իրանի դեմ։ Այդ մասին հաղորդում է Mehr-ը։

Մասջեդիի խոսքով՝ նման գործողության դեպքում Իրանը և «Դիմադրության ճակատը» կմիանան պայքարին, ինչի արդյունքում, նրա գնահատմամբ, հակառակորդը պարտություն կկրի։ Նա Վաշինգտոնին կոչ է արել չդիմել այդպիսի «հիմար քայլի»։

Գեներալը նշել է, որ «Ղուդս» ուժերը պատրաստ են դիմակայել ԱՄՆ-ի հնարավոր ցամաքային գործողությանը։ Նա նաև պնդել է, որ Իրանը ներկայում ավելի ուժեղ է, քան նախորդ տասնամյակներին, իսկ «Դիմադրության ճակատը» դարձել է հզոր ուժ և շարունակում է կարևոր դեր ունենալ տարածաշրջանային ու միջազգային մակարդակներում։

Մասջեդին մերժել է այն տեսակետը, թե Իրանի դաշնակից զինված խմբավորումների տարածաշրջանային ցանցը կարող էր թուլանալ ռազմական գործողությունների կամ առանձին հրամանատարների մահվան պատճառով։ Նրա հայտարարությունը հնչել է Իրանի դեմ ԱՄՆ-ի հնարավոր նոր ռազմական գործողությունների քննարկումների ֆոնին։ Ավելի վաղ ԱՄՆ նախագահ Դոնալդ Թրամփը հայտնել էր, որ դիտարկում է Իրանի նկատմամբ հետագա գործողությունների տարբերակները, իսկ Իրանի իշխանությունները հայտարարել էին հնարավոր նոր հարձակմանը պատասխանելու պատրաստակամության մասին։

Աղբյուր՝ 168.am