Քաղաքականություն
«Անբարոյական է». Մերցը՝ Շրյոդերի մասնակցության մասին Պուտինի ծննդյան տոնակատարությանը
Գերմանիայի կանցլեր Ֆրիդրիխ Մերցը անբարոյական է համարում երկրի նախկին կանցլեր Գերհարդ Շրյոդերի մասնակցությունը Վլադիմիր Պուտինի ծննդյան օրվա տոնակատարությանը։ Այդ մասին հայտարարել է Գերմանիայի կառավարության ներկայացուցիչ Շտեֆեն Մայերը՝ նշելով, որ Պուտինի հրամանները ամեն օր անթիվ տառապանք են պատճառում և Ուկրաինայում հանգեցնում մարդկանց մահվան ու վիրավորումների, հաղորդում է DW-ն։
Գերմանիայի արտաքին գործերի և ներքին գործերի նախարարությունները հայտնել են, որ Շրյոդերի այցի մասին նախապես տեղեկացված չեն եղել։ Գերմանիայի դեսպանատունը նույնպես որևէ աջակցություն չի ցուցաբերել նրան այցի ընթացքում։
Շրյոդերի անդամակցած Գերմանիայի Սոցիալ-դեմոկրատական կուսակցությունում հայտարարել են, որ նա Ռուսաստանում գտնվել է որպես մասնավոր անձ։ «Մենք Գերմանիայում չպետք է ամեն անգամ «սատանայի վտարում» կազմակերպենք, երբ նախկին կանցլերը մեկնում է Մոսկվա»,- t-online պորտալին ասել է կուսակցության արտաքին քաղաքականության հարցերով փորձագետ, բունդեսթագի պատգամավոր Ռալֆ Շտեգները։
Շտեգների խոսքով՝ եթե այցը նպաստի Ուկրաինայում հրադադարին մոտենալուն, ապա դրանում դատապարտելի ոչինչ չկա։
Աղբյուր՝ 168.am