ԵՄ արտոնությունները չեն ներառել հայկական ալյումինե փայլաթիթեղը․ մաքսատուրքը կմնա 7,5%

Եվրամիությունը հաստատել է Հայաստանից ներմուծվող ապրանքների սակագնային արտոնությունների փաթեթը։ Կանոնակարգը հրապարակվել է ԵՄ իրավական ակտերի պաշտոնական տեղեկագրում և ուժի մեջ կմտնի հոկտեմբերի 10-ից՝ երկու տարի ժամկետով՝ մինչև 2028 թվականի հոկտեմբերի 11-ը։ Այս մասին գրում է «ՍպուտնիկԱրմենիան»։

Մաքսատուրքերից կազատվեն թարմ ձուկը, հանքային ջրերը, ծաղիկները, մրգերն ու բանջարեղենը։ Սակայն մրգերի մի շարք տեսակների համար սահմանվել են անմաքս ներմուծման տարեկան քվոտաներ․ խաղողի համար՝ 5 հազար տոննա, ծիրանի՝ 7 հազար, կեռասի՝ 2 հազար, դեղձի՝ 3,5 հազար, սալորի՝ 1,5 հազար, իսկ ելակի՝ 2,5 հազար տոննա։ Հայաստանից տվյալ ապրանքների ընդհանուր ներմուծման դեպքում քվոտան գերազանցելուց հետո կգանձվի մաքսատուրք։

Արտոնությունները տարածվում են հայկական կոնյակի՝ բրենդիի, բայց ոչ գինու վրա։ Ոչ պարենային ապրանքներից արտոնություն է ստացել հագուստը, իսկ մետաղագործական արտադրանքներից կչեղարկվի ֆերոհամաձուլվածքների մաքսատուրքը։ Միևնույն ժամանակ, արտոնությունների ցանկում չի ներառվել ալյումինե փայլաթիթեղը, որը Հայաստանի ոչ հումքային խոշորագույն արտահանվող ապրանքներից է դեպի ԵՄ։ Դրա մաքսատուրքը կպահպանվի 7,5 տոկոսի մակարդակում։

Ռուսաստանը երկար ժամանակ հայկական մրգի և բանջարեղենի արտահանման հիմնական շուկան է եղել․ այնտեղ էր ուղղվում արտադրանքի ավելի քան 90 տոկոսը։ Սակայն մայիսի վերջին Ռոսսելխոզնադզորը սկսել է փուլային սահմանափակումներ կիրառել այդ ապրանքների ներմուծման նկատմամբ։ 2026 թվականի հունվար-հուլիսին Հայաստանից համապատասխան արտադրանքի արտահանումը կազմել է 72 մլն դոլարից պակաս՝ 2025 թվականի նույն ժամանակահատվածի մոտ 120 մլն դոլարի փոխարեն։

Ծաղիկների արտահանումը կրճատվել է մոտ 40 մլն դոլարից մինչև 20 մլն դոլար, ձկան արտահանումը՝ 23 մլն-ից մինչև 19 մլն, իսկ հանքային ջրերինը՝ 13 մլն-ից մինչև 11 մլն դոլար։

tvyal.com վերլուծական հարթակի ղեկավար Աղասի Թավադյանի ավելի վաղ հրապարակած տվյալներով՝ 2025 թվականին ԵԱՏՄ շուկա է արտահանվել հայկական արտադրության ձկան և ձկնամթերքի 98 տոկոսը, կտրած ծաղիկների 94 տոկոսը, պղպեղի և սմբուկի 98 տոկոսը, հանքային ջրի 86 տոկոսը, լոլիկի 100 տոկոսը, կորիզավոր մրգերի 89 տոկոսը, իսկ ելակի և այլ հատապտուղների՝ 98 տոկոսը։

2025 թվականի առաջին կիսամյակում Հայաստանը ԵՄ է արտահանել 250 տոննայից փոքր-ինչ ավելի միրգ և բանջարեղեն, իսկ 2026 թվականի նույն ժամանակահատվածում՝ 147 տոննա։ Համեմատության համար՝ Ռուսաստան այդ ապրանքների արտահանումը համապատասխան ժամանակահատվածներում կազմել է ավելի քան 56 հազար և շուրջ 20 հազար տոննա։

Աղբյուր՝ 168.am