«Մահապատիժը անընդունելի է». Լևոն XIV

Հռոմի պապ Լևոն XIV-ը հոկտեմբերի 10-ին դեմ է արտահայտվել մահապատժին՝ այն անվանելով «անընդունելի»։ Նրա հայտարարությունը հրապարակվել է Մահապատժի դեմ պայքարի միջազգային օրվա կապակցությամբ՝ ԱՄՆ պաշտպանության նախարարության՝ Նիդալ Հասանի մահապատիժը ուղիղ եթերում հեռարձակելու ծրագրերի մասին հայտարարությունից մի քանի օր անց։

X սոցիալական ցանցում կատարած գրառման մեջ պապը մեջբերել է Կաթոլիկ եկեղեցու մահապատժի վերաբերյալ նորացված ուսմունքը, որն ընդունվել է Ֆրանցիսկոս պապի օրոք։ Այդ դիրքորոշմամբ մահապատիժը համարվում է մարդու անքակտելի արժանապատվության ոտնահարում։

«Հանրային բարօրությունը կարելի է պաշտպանել, իսկ արդարության պահանջները՝ կատարել առանց մահապատժի կիրառման»,— ասվում է Լևոն XIV-ի գրառման մեջ։ Նշվում է նաև, որ ժամանակակից քրեակատարողական համակարգերը հնարավորություն են տալիս պաշտպանել հասարակությունը՝ մեղավորներին չզրկելով քավության հնարավորությունից։

Պապը ուղղակիորեն չի անդրադարձել Նիդալ Հասանի նախատեսվող մահապատժին։ Սակայն նույն օրը Վատիկանի պետքարտուղար, կարդինալ Պիետրո Պարոլինը քննադատել է ԱՄՆ իշխանությունների ծրագիրը՝ մահապատժի հեռարձակումը համարելով «անընդունելի»։ Նրա խոսքով՝ մահը տեսարանի վերածելն անթույլատրելի է նույնիսկ ծանր հանցագործություն կատարած անձի դեպքում։ Պարոլինը նաև նշել է, որ Կաթոլիկ եկեղեցին լիովին դեմ է մահապատժին, քանի որ այն անհամատեղելի է մարդկային արժանապատվության հետ և զսպող ազդեցություն չի ունենում։

Նիդալ Հասանը մեղավոր է ճանաչվել 2009 թվականին Տեխասի Ֆորտ Հուդ ռազմաբազայում հրաձգության հետևանքով 13 մարդու սպանության և ևս 32-ին վիրավորելու համար։ Նախապես հայտարարված ծրագրերի համաձայն՝ նրա մահապատիժը պետք է իրականացվի դեկտեմբերի 3-ին։

2018 թվականին Ֆրանցիսկոս պապը փոփոխություն էր կատարել Կաթոլիկ եկեղեցու կաթեխիզիսում՝ ամրագրելով մահապատժի անթույլատրելիությունը ցանկացած հանգամանքում։ Մինչ այդ եկեղեցական ուսմունքը բացառիկ դեպքերում թույլ էր տալիս մահապատիժը, եթե այն համարվում էր մարդկային կյանքերը պաշտպանելու միակ միջոցը։

Պենտագոնի ծրագրերին դեմ է արտահայտվել նաև ԱՄՆ կաթոլիկ եպիսկոպոսների համաժողովի ղեկավար, արքեպիսկոպոս Փոլ Քոքլին։ Նա իր ցնցումն ու խոր վիշտն է հայտնել՝ որոշումը որակելով որպես մահվան մշակույթի քարոզչություն և կոչ անելով վերանայել այն։ Քոքլին ընդգծել է, որ Հասանի հանցագործությունները չեն կարող արդարացվել, սակայն նրա հրապարակային մահապատիժը կարող է խաթարել ամերիկյան հասարակության բարոյական հիմքերը։

Աղբյուր՝ 168.am