«Եթե միակ խնդիրը պետության անվանափոխությունն է, եկեք հաշտության համաձայնագիր ստորագրենք»․ Արամ Սարգսյան

«Հանրապետություն» կուսակցության առաջնորդ Արամ Սարգսյանն առաջարկում է Ադրբեջանի հետ խաղաղության համաձայնագիրը ստորագրել՝ ամրագրելով, որ այն ուժի մեջ կմտնի ՀՀ Սահմանադրության փոփոխությունից հետո։ Նրա խոսքով՝ այդ կերպ Հայաստանը կզրկի Ադրբեջանին ժամանակ ձգելու և մանևրելու հնարավորությունից։

Սարգսյանը նշել է, որ Ադրբեջանի նախագահ Իլհամ Ալիևը վերջնական խաղաղության համաձայնագրի ստորագրմանը խոչընդոտող միակ հարցը համարում է ՀՀ Սահմանադրությունը, որտեղ, ըստ նրա, տարածքային պահանջ կա։ «Առանց հանրաքվեի Ադրբեջանին խաղաղության փաստաթղթի ստորագրումը պարտադրելը իրատեսական չէ»,— գրել է նա։

Որպես նախադեպ՝ Սարգսյանը մատնանշել է Հունաստանի և Մակեդոնիայի միջև ձեռք բերված համաձայնությունը։ 2018-ին ստորագրվել է համաձայնագիր, իսկ 2019-ին պետությունը վերանվանվել է Հյուսիսային Մակեդոնիա։ Նրա առաջարկով՝ Հայաստանի և Ադրբեջանի դեպքում խաղաղության փաստաթուղթը կարող է ստորագրվել Վաշինգտոնում՝ Թրամփի հովանու ներքո, և ուժի մեջ մտնել Սահմանադրության փոփոխությունից հետո։

Սարգսյանի կարծիքով՝ այս տարբերակը Ադրբեջանին կդնի ընտրության առաջ և ցույց կտա՝ արդյոք նրա նախապայմանը իրական է, թե ժամանակ ձգելու միջոց։ Նա նաև պնդել է, որ այդ քայլով Հայաստանը կդառնա նախաձեռնող, իսկ Սահմանադրության հանրաքվեի արդյունքը՝ ավելի կանխատեսելի։

Աղբյուր՝ aravot.am