Լիբիայի նախկին առաջնորդ Մուամար Քադաֆիի մահից հետո տեղեկություն է հրապարակվել նրա ֆինանսական դրության մասին: Պարզվել է՝ Քադաֆին աշխարհի ամենահարուստ մարդն է եղել:
Ինչպես հաղորդում է РБК-ն, վկայակոչելով Լիբիայի նոր իշխանությունների պաշտոնական տվյալները, Քադաֆիի կարողությունը գնահատվել է 200 մլրդ դոլար: Այսպիսով, Ջամահիրիայի նախկին առաջնորդն ավելի հարուստ էր, քան մեքսիկացի մագնատ Կառլոս Սլիմին, որը համարվում էր 2010-2011 թթ. Երկիր մոլորակի ամենահարուստ մարդը: Իսկ Սաուդյա Արաբիայի թագավորը, որը համարվում է աշխարհի ամենահարուստ կառավարիչը, Քադաֆիի կարողությանը զիջում է 10 անգամ:
Իր գումարները Քադաֆին պահել է բանկային հաշիվներում, ամբողջ աշխարհում ներդրել է անշարժ գույքի և կորպորատիվ ներդրումների մեջ: Նախկին բռնապետի այդպիսի ակտիվներից է Լոնդոնի հարուստ թաղամասերից մեկում գտնվող 15 մլն դոլար արժողությամբ առանձնատունը, որը նա գնել է 2009 թ.:
