Ռոբերտ Ֆիցոն նախընտրական ուղերձում աջակցել է Ալեքսանդր Վուչիչին

Սլովակիայի վարչապետ Ռոբերտ Ֆիցոն աջակցություն է հայտնել Ալեքսանդր Վուչիչի՝ Սերբիայի վարչապետի պաշտոնում թեկնածությանը՝ երկրի հոկտեմբերի 25-ին նախատեսված արտահերթ խորհրդարանական ընտրություններից առաջ։

Ֆիցոն պետք է ելույթ ունենար Բելգրադում իշխող Սերբական առաջադիմական կուսակցության (SNS) հանրահավաքում, սակայն բժշկի խորհրդով չեղարկել է այցը։ Նրա նախապես պատրաստված ուղերձը, այնուամենայնիվ, ընթերցվել է «Բելգրադյան արենա» մարզադաշտում հավաքված կուսակցության հազարավոր աջակիցների առաջ, հայտնում է Rapporteur-ը։

«Ես աջակցում եմ Ալեքսանդրին, որովհետև նա թույլ չի տալիս, որ աշխարհում որևէ մեկը՝ որքան էլ ազդեցիկ լինի, ղեկավարի ձեր երկիրը։ Նա լսում է միայն ձեզ՝ Սերբիայի ժողովրդին», — ասվում է Ֆիցոյի ուղերձում։

Սլովակիայի վարչապետը նաև նշել է, որ Սերբիան Եվրամիությանն անդամակցելու ճանապարհին բախվում է նոր պայմանների, քանի որ Բելգրադը ձգտում է պաշտպանել իր ինքնիշխանությունը։ Ֆիցոյի հայտարարությունը հնչել է Ռուսաստանի նախագահ Վլադիմիր Պուտինի՝ Վուչիչի՝ Սերբիայի հաջորդ վարչապետը դառնալու հույսը հայտնելուց մի քանի օր անց։

Վուչիչը մերժել է այն քննադատությունը, թե Պուտինի և Ֆիցոյի աջակցությունը միջամտություն է Սերբիայի ներքին գործերին։ Նա հայտարարել է, որ իր հակառակորդների կողմնակիցները, հակառակը, երկրից պահանջում են զիջումներ, այդ թվում՝ Կոսովոյի հարցում։

Վուչիչի և Ֆիցոյի հարաբերությունները վերջին տարիներին սերտացել են՝ նաև Ուկրաինայի հակամարտության վերաբերյալ նրանց նմանատիպ դիրքորոշումների պատճառով։ Երկու առաջնորդներն էլ բազմիցս հանդես են եկել ռազմական գործողությունները դադարեցնելու օգտին և քննադատել Ռուսաստանի դեմ պատժամիջոցների հետագա խստացումը։

Սերբիայում ընտրություններն անցկացվում են երկարատև հակակառավարական և հակակոռուպցիոն բողոքի ցույցերի պայմաններում։ Դրանք գլխավորում են ուսանողները և սկսվել են 2024 թվականի նոյեմբերին Նովի Սադի երկաթուղային կայարանում հովանոցի փլուզումից հետո, որի հետևանքով զոհվել է 16 մարդ։ Ուսանողական շարժումն այս ընտրություններում դարձել է գործող իշխանության գլխավոր մրցակիցներից մեկը։

Ֆիցոն նախկինում ևս հրապարակայնորեն աջակցել է Վուչիչին։ 2024 թվականի մայիսին Սլովակիայի վարչապետի դեմ մահափորձից հետո Սերբիայի նախագահը նրան անվանել էր այն սակավաթիվ եվրոպական առաջնորդներից մեկը, որոնք «սեփական կարծիք ունեն»։

Աղբյուր՝ 168.am