Քաղաքականություն
Օլիվիե Ֆորը պատրաստ է հայության կենսական հարցերը պահել Ֆրանսիայի քաղաքական օրակարգում
Փարիզում աշխատանքային այցով գտնվող ՀՅԴ Հայաստանի Գերագույն մարմնի ներկայացուցիչ, ՀՀ ԱԺ պատգամավոր Իշխան Սաղաթելյանը ՀՅԴ Բյուրոյի անդամ Մուրադ Փափազյանի ուղեկցությամբ հանդիպել է Ֆրանսիայի սոցիալիստական կուսակցության ղեկավար, Ֆրանսիայի ԱԺ պատգամավոր Օլիվիե Ֆորի հետ։ Ֆորը պատրաստվում է մասնակցել Ֆրանսիայի նախագահական ընտրություններին։
Հանդիպմանը ներկա են եղել նաև ՀՅԴ կուսակցական գործիչներ Ֆրանսիայից և Հայաստանից։
Իշխան Սաղաթելյանը շնորհակալություն է հայտնել Օլիվիե Ֆորին՝ հայանպաստ երկարամյա գործունեության համար, և կարևորել Ֆրանսիայի սոցիալիստական կուսակցության ու ՀՅԴ-ի միջև տասնամյակների պատմություն ունեցող ջերմ ու եղբայրական հարաբերությունները։
Օլիվիե Ֆորը վերահաստատել է հայության համար կենսական հարցերը Ֆրանսիայի քաղաքական օրակարգում պահելու ուղղությամբ աշխատանքը շարունակելու պատրաստակամությունը։
Կողմերը տեղեկություններ են փոխանակել իրենց կուսակցությունների առջև ծառացած մարտահրավերների շուրջ և պայմանավորվել տարբեր ոլորտներում խորացնել քաղաքական երկխոսությունն ու համագործակցությունը։
Քննարկվել են նաև արցախահայության վերադարձի իրավունքի, գերիների ազատ արձակման և մշակութային ժառանգության պաշտպանության խնդիրների միջազգայնացմանն ուղղված քայլերը։ ՀՅԴ Հայաստանի Գերագույն մարմնի հանրային կապերի գրասենյակը նշում է, որ այդ հարցերում Օլիվիե Ֆորը մշտապես մեծ ներդրում է ունեցել։
Աղբյուր՝ yerevan.today
