Արտաքին աշխարհ
«Սպուտնիկ Արմենիա». Ադրբեջանը Ջերմուկի մոտ ընդլայնել է դիրքային ենթակառուցվածքը
«Սպուտնիկ Արմենիայի» հաղորդմամբ՝ Ադրբեջանը վերջին ամիսներին ընդլայնել և ամրացրել է Ջերմուկի մերձակայքում՝ Հայաստանի օկուպացված տարածքներում, տեղակայված դիրքերը։
Ըստ հրապարակման՝ Ադրբեջանը Հայաստանի տարածք է ներխուժել 2022 թվականի սեպտեմբերին և, աղբյուրի հաշվարկներով, Ջերմուկի մոտակայքում ֆիզիկական ներկայություն է հաստատել ավելի քան 70 քառ. կմ տարածքում։ 2022-2023 թվականներին այդ հատվածում իրականացվել են զգալի ինժեներական աշխատանքներ։
«Սպուտնիկ Արմենիան» նշում է, որ 2026 թվականի հուլիսից սեպտեմբեր ընկած ժամանակահատվածի արբանյակային լուսանկարներում երևում է նոր և ընդլայնված դիրքային ենթակառուցվածք։ Մի շարք հատվածներում ճանապարհների լայնացման, դիրքերի կահավորման և ընդլայնման աշխատանքների ծավալը, ըստ հրապարակման, վկայում է համալիր դիրքային ենթակառուցվածքի զարգացման մասին։
Նյութի համաձայն՝ աշխատանքներն իրականացվել են նախկին խորհրդային սահմանից 1,2-6 կմ հեռավորության վրա գտնվող դիրքերի հատվածում։ «Սպուտնիկ Արմենիան» հղում է անում ԽՍՀՄ ԶՈւ ԳՇ 1974 թվականի տեղագրական քարտեզին, ըստ որի՝ այդ դիրքերը գտնվել են Հայկական ԽՍՀ տարածքում։
Հրապարակման մեջ նաև նշվում է, որ ռազմական ենթակառուցվածքի ամրապնդումն ու ընդլայնումը շարունակվել են այն բանից հետո, երբ սահմանազատման գործընթացը սկսվել է խորհրդային քարտեզների հիման վրա, ինչպես նաև 2025 թվականի օգոստոսի 8-ին Վաշինգտոնում խաղաղության համաձայնագրի տեքստի նախաստորագրումից հետո։
Աղբյուր՝ yerevan.today
