Կատալոնիայում տեղումների ծավալը ռեկորդային մակարդակի է հասել

Բարսելոնայում և հարակից շրջաններում գրանցվել է առնվազն վերջին 20 տարվա ամենաանձրևոտ օրը, հաղորդում է EFE-ն։ Կատալոնիայի օդերևութաբանական ծառայության՝ Meteocat-ի տվյալներով՝ քաղաքի Ռավալ շրջանում տեղատարափի ընթացքում տեղացել է մոտ 190 մմ անձրև։ Diagonal-ի Zona Universitària կայանում արձանագրվել է ավելի քան 170 մմ, իսկ Բադալոնայի թանգարանի մոտ՝ 152 մմ տեղում։

Բարսելոնայի շրջակայքում ցուցանիշներն ավելի բարձր են եղել․ Կաբրիլսում տեղացել է 226,6 մմ, Գրանոլյերսում՝ 224,3 մմ, իսկ Մատարոյում՝ 220,1 մմ։ Ռավալում մեկ րոպեում գրանցվել է 3,4 մմ, իսկ կես ժամում՝ 36,1 մմ տեղում։ Օրական ցուցանիշը գրեթե կրկնակի գերազանցել է այդ վայրում նախկին առավելագույնը, որը գրանցվել էր 2017 թվականի մարտի 24-ին։

Meteocat-ի համաձայն՝ հորդառատ անձրևները կապված են Միջերկրական ծովի վրա ձևավորված մեզոսանդղակի կոնվեկտիվ համակարգի հետ։ Ծառայությունը կանխատեսել էր, որ տեղումները կշարունակվեն նաև կիրակի, իսկ որոշ վայրերում կլինեն ուժեղ և հորդառատ։

Անբարենպաստ եղանակը Կատալոնիայում բազմաթիվ ջրածածկումների պատճառ է դարձել։ Կիրակի առավոտվա դրությամբ հրշեջները հարյուրավոր հաղորդումներ էին ստացել միջադեպերի, հիմնականում՝ ջրի հետ կապված դեպքերի մասին։ Տարածաշրջանում պահպանվել է նաև գետերի վարարելու վտանգը։ Իշխանությունները բնակիչներին կոչ են արել պահպանել տեղաշարժի սահմանափակումները և հնարավորության դեպքում մնալ տանը։

Ռավալի Meteocat-ի կայանը գործում է 2006 թվականի հոկտեմբերից, ինչի շնորհիվ ներկայիս ցուցանիշը հնարավոր է համեմատել առնվազն երկու տասնամյակի դիտարկումների հետ։

Աղբյուր՝ 168.am