Վահե Բեգոյանը քննադատել է իշխանությունների քաղաքականությունն ու պաշտպանել Ամենայն Հայոց Կաթողիկոսի կարգավիճակը

«Դասեր» հաղորդաշարի ընթացքում դիրիժոր Վահե Բեգոյանը անդրադարձել է Սյունիքում տեղի ունեցած միջադեպին, Հայաստանի անվտանգային իրավիճակին, «Աղոթքի երկրորդ նախաճաշին» և Հայ Առաքելական եկեղեցու շուրջ ընթացող քննարկումներին։

Բեգոյանի խոսքով՝ Շաքի բնակավայր ադրբեջանցի զինծառայողի ներխուժումից հետո պետական և իրավապահ մարմինները պատշաճ արձագանք չեն տվել։ Նա պնդել է, որ սահմանամերձ բնակչությունը մնացել է անպաշտպան, իսկ երկրի պաշտպանությունը մեծապես հենվում է աշխարհազորի վրա։ Դիրիժորը Անի Ավետիսյանին անվանել է հերոսական կին՝ նշելով, որ նա զինված ադրբեջանցուց պաշտպանել է իր երեխաներին։

Նա նաև քննադատել է իշխանությունների վերաբերմունքը միջադեպի նկատմամբ՝ պնդելով, որ պաշտոնական մակարդակով մեղադրանքներ են հնչում հայ կնոջ հասցեին, մինչդեռ ադրբեջանցու գործողությունները արդարացվում են։ Բեգոյանը հարց է բարձրացրել, թե ինչու Սյունիքի համայնքապետերը չեն արձագանքել դեպքին։

Անդրադառնալով կրոնական թեմաներին՝ Բեգոյանը բացասաբար է գնահատել Հայաստանի Հանրապետության «Աղոթքի երկրորդ նախաճաշի» շրջանակում Նիկոլ Փաշինյանի ելույթը։ Նրա խոսքով՝ «Ավետյաց երկիր» հասկացությունը հոգևոր կատեգորիա է և չպետք է նույնացվի որևէ պետության միջազգայնորեն ճանաչված տարածքի հետ։ Բեգոյանը նշել է, որ քրիստոնեական ընկալմամբ Ավետյաց երկիրը Տիրոջ թագավորությունն է, իսկ եկեղեցին՝ այդ իրականության «դեսպանատունը» երկրագնդի վրա։

Բեգոյանը քննադատել է նաև «Աղոթքի նախաճաշին» հայ հոգևորականների մասնակցությունը՝ պնդելով, որ այդ միջոցառումը կարող է եկեղեցուն ներքաշել իրեն չպատկանող օրակարգերի մեջ։ Նա «Հայ եկեղեցու դեմ պայքարը» ներկայացրել է որպես ավելի լայն՝ համաշխարհային գործընթացի հայկական ճակատ։

Դիրիժորը պաշտպանել է Ամենայն Հայոց Կաթողիկոս Գարեգին Երկրորդի կարգավիճակը։ Նա հայտարարել է, որ կաթողիկոսի օծումը, որին մասնակցել են Մեծի Տանն Կիլիկիո Կաթողիկոսը, Երուսաղեմի և Կոստանդնուպոլսի պատրիարքները, աստվածային և անվիճարկելի ակտ է։ Բեգոյանի կարծիքով՝ պետական իշխանությունը չի կարող որոշել՝ կաթողիկոսը լեգիտիմ է, թե ոչ, իսկ եկեղեցու առաջնորդի հարցում իշխանությունների միջամտությունն անընդունելի է։

Նա նաև պնդել է, որ եթե իշխանությունների միջամտությունը չլիներ, Գարեգին արքեպիսկոպոսը կաթողիկոս կդառնար 1995 թվականին, ոչ թե 1999-ին։ Բեգոյանը նշել է, որ այդ ժամանակ Գարեգին արքեպիսկոպոսը, իր խոսքով, զիջել էր գահը Գարեգին Առաջին կաթողիկոսին։

Հաղորդման ընթացքում Բեգոյանը խոսել է նաև Գանձասարի և հայկական մշակութային ժառանգության մասին՝ քննադատելով Հայաստանի իշխանությունների լռությունը Ադրբեջանի կողմից հայկական հուշարձանների վերաբերյալ հայտարարությունների ու գործողությունների համատեքստում։ Նա անդրադարձել է նաև ամերիկացի կրոնական գործիչ Փաուլա Ուայթի գործունեությանը՝ այն բնութագրելով որպես խարիզմատիկ բողոքականության դրսևորում և հակադրելով Հայ Առաքելական եկեղեցու ավանդությանը։

Աղբյուր՝ 168.am