Շաքիում վիրավորված Անի Ավետիսյանի ոտքը փրկելու համար բժիշկները շարունակում են պայքարը

Սիսիան համայնքի Շաքի բնակավայրում ադրբեջանցի զինծառայողի կողմից ոտքից վիրավորված Անի Ավետիսյանը վիրահատվել է։ Նրա քրոջ՝ Արփի Ավետիսյանի խոսքով՝ բժիշկները փորձում են կանխել ոտքի հեռացումը։

Արփի Ավետիսյանը 168.am-ի հետ զրույցում հայտնել է, որ վիրահատության ընթացքում հեռացվել են փշրված ոսկորի հատվածն ու ասկոլկաները։ Նրա փոխանցմամբ՝ բժիշկներն ասել են, որ երկու բուռի չափ ասկոլկա և ոսկորի փշրանքներ են հեռացրել, իսկ վերքը մաքրել են՝ վարակը կանխելու համար։ Ըստ նրա՝ Անիին դեռ առնվազն երեք բարդ վիրահատություն է սպասվում, իսկ մոտ ութ ամիս անց նախատեսվում է ևս մեկ վիրահատություն։

Ավետիսյանի ամուսնու խոսքով՝ վիրահատությունը շտապ է կատարվել, որպեսզի վարակը չտարածվի ամբողջ ոտքով։ Նա նշել է, որ բժիշկները նախ պետք է պարզեն՝ հնարավոր կլինի՞ պահպանել ոտքը։ Նրա փոխանցմամբ՝ ոսկորը լրջորեն փշրվել է, և բժիշկները, հնարավորինս քիչ հատված հեռացնելու նպատակով, նախատեսված 14 սանտիմետրի փոխարեն հեռացրել են մոտ 8 սանտիմետր։ Ընտանիքին հայտնել են նաև, որ ծնկի հատվածը թուլացած է, և դեռ պարզ չէ՝ ինչպես կընթանա ոտքի վերականգնումը։

Արփի Ավետիսյանը դժգոհություն է հայտնել Շաքիի վարչական ղեկավարի այն հայտարարության առնչությամբ, թե կրակոց չի եղել, և կնոջ սրունքը միայն փոքր վնասվածք է ստացել։ Նրա խոսքով՝ ընտանիքի համար առաջնայինը Անիի ոտքը պահպանելն է, իսկ պետական մարմինների ներկայացուցիչները հիվանդանոց չեն այցելում։ Նա նշել է, որ Անիի հարազատներին տեսակցության համար օրական ընդամենը մի քանի րոպե են թույլ տալիս։

Ընտանիքի փոխանցմամբ՝ Առողջապահության նախարարը հիվանդանոց այցելել է երեկոյան, երբ հարազատները այնտեղ չեն եղել։ Նրանք նաև հայտնել են, որ բուժման ծախսերը հոգում է պետությունը։

Հոկտեմբերի 1-ին Ազգային անվտանգության ծառայությունը հայտնել էր, որ Ադրբեջանի զորամասերից մեկի զինծառայողը հատել է Հայաստանի սահմանը՝ Սյունիքի մարզի Սիսիանի հատվածում։ Նույն օրը՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ էր ստացվել Շաքիում ՀՀ քաղաքացու ոտքին կրակելու վերաբերյալ։ ԱԱԾ-ի հաղորդմամբ՝ հանցանքը կատարել էր ադրբեջանցի զինծառայողը, որը ձերբակալվել, ապա կալանավորվել էր։

Ըստ պաշտոնական հաղորդագրության՝ միջադեպի հետևանքով վնասվածք էր ստացել նաև Անիի անչափահաս որդին՝ դաստակի հատվածում, իսկ նրա անչափահաս քույրը հոգեբանական ծանր վիճակում էր հայտնվել։

Աղբյուր՝ 168.am