Ոստիկանությունը կանխել է Երևանի 33-ամյա բնակչի սպանության նախապատրաստությունը

ՀՀ ՆԳՆ ոստիկանության փոխանցմամբ՝ Քրեական ոստիկանության ծանր հանցագործությունների դեմ պայքարի վարչության ծառայողները տեղեկություններ են ստացել, որ 2026 թվականի հունվարի 21-ին Ծաղկաձորում Երևանի 33-ամյա բնակիչը ևս երկու անձի հետ ծեծի է ենթարկել Երևանի 36-ամյա բնակչի՝ նրան պատճառելով մարմնական վնասվածքներ։ Ոստիկանության տվյալներով՝ 33-ամյա տղամարդը շեշտել է քրեական աստիճանակարգության բարձրագույն կարգավիճակ ունենալու հանգամանքը։

Դեպքից հետո 36-ամյա տղամարդը, ըստ իրավապահների, նախապատրաստել է 33-ամյա բնակչի սպանությունը և այդ նպատակով ապօրինի հրազեն ձեռք բերել։ Տեղեկանալով այդ մտադրության մասին՝ 33-ամյա տղամարդն էլ տարբեր տեսակի հրազեն է ձեռք բերել՝ հարմար առիթի դեպքում նախահարձակ լինելու և նրան սպանելու նպատակով։

Ոստիկանության հաղորդմամբ՝ հակամարտությունը շարունակվել է օգոստոսին։ 36-ամյա տղամարդը դեռևս չպարզված անձանց հետ 33-ամյա բնակչին նկատել է նրա բնակության վայրի մոտ և ավտոմեքենան վարել նրա ուղղությամբ։ Դրանից հետո փոխադարձ հրաձգություն է տեղի ունեցել։

Փաստաթղթերը ներկայացվել են նախաքննական մարմին, և նախաձեռնվել է քրեական վարույթ՝ սպանության նախապատրաստության, քրեական աստիճանակարգության բարձրագույն կարգավիճակ տալու, ստանալու կամ պահպանելու, ինչպես նաև զենք-զինամթերքի ապօրինի շրջանառության հատկանիշներով։

Ոստիկանության իրականացրած օպերատիվ-հետախուզական միջոցառումների արդյունքում, ըստ հաղորդագրության, ձեռք են բերվել տվյալներ, որ 33-ամյա բնակիչը ծրագրել էր սպանել 36-ամյա տղամարդուն, սակայն հանցագործության կատարումը կանխվել է։

Հոկտեմբերի 5-ին դատարանի որոշմամբ խուզարկություններ են կատարվել 33-ամյա տղամարդու, նրա հոր և ընկերոջ բնակության վայրերում։ 33-ամյա տղամարդու բնակարանից հայտնաբերվել են 49 տարբեր տեսակի դեղահաբեր և մեթադոնային լուծույթով երեք սրվակ։

Դեպքի առթիվ ձերբակալվել են 33-ամյա տղամարդը, նրա 54-ամյա հայրը, 35-ամյա ընկերը և Երևանի 36-ամյա բնակիչը։

Աղբյուր՝ yerevan.today