«Պատերազմի ժամանակ մեզ իրականում ոչ ոք չօգնեց». Բաքվից ուղերձ Թուրքիային՝ ըստ վերլուծաբանի

Իսրայելի պատերազմը Գազայում բացահայտել է Ադրբեջանի և Թուրքիայի շահերի տարբերությունները, չնայած երկու երկրների միջև երկար տարիների ռազմական ու քաղաքական դաշինքին, գրում է BBC-ն։

Ադրբեջանում 1990-ականներից պահպանվում է «Երկու երկիր, մեկ ազգ» կարգախոսը։ Իլհամ Ալիևը բազմիցս շնորհակալություն է հայտնել Թուրքիային Ղարաբաղյան պատերազմում աջակցության համար, իսկ Բաքվում թուրքական դրոշներ են ծածանվել։ Սակայն այժմ Ադրբեջանի նախագահը պնդում է, որ պատերազմում որևէ երկիր իրեն չի օգնել, և որ Բաքուն զենքի համար պարզապես վճարել է։

«Պատերազմի ժամանակ մեզ իրականում ոչ ոք չօգնեց, բայց Ադրբեջանը դաշնակցային հարաբերություններ ունի Թուրքիայի հետ, և երկու երկրների միջև տարաձայնություններ չկան», BBC-ին ասել է Ադրբեջանի խորհրդարանի անդամ Ռասիմ Մուսաբեկովը։

Միաժամանակ ադրբեջանական լրատվամիջոցները, առանց Թուրքիային հիշատակելու, գրում են, որ Ադրբեջանը անկախ երկիր է և չպետք է ենթարկվի արտաքին ազդեցության՝ վկայակոչելով նախագահի ելույթից հատվածներ։

Անկարայում բնակվող քաղաքական վերլուծաբան Հասան Սելիմ Օզերթեմի կարծիքով՝ Ալիևի հայտարարությունները կարող են Թուրքիային ուղղված ուղերձ լինել։ «Հաշվի առնելով Ալիևի հայտարարությունները, որ ոչ ոք չի օգնել Ադրբեջանին՝ կարելի է ենթադրել, որ դրանք ձևակերպվել են որպես Թուրքիային ուղղված ուղերձ»,– ասել է նա։

Օզերթեմը նշել է, որ Ադրբեջանում ազգային ինքնությունը մեծապես կառուցվում է Ղարաբաղը վերադարձնելու և այդ արդյունքին հենց ադրբեջանցիների ուժերով հասնելու գաղափարի շուրջ։ 2020 թվականի պատերազմում Ադրբեջանն օգտագործել է նաև իսրայելական Harop անօդաչու թռչող սարքեր։ 2020 թվականի նոյեմբերի 10-ին՝ Ռուսաստանի միջնորդությամբ Հայաստանի հետ համաձայնագրի կնքումից հետո, Բաքվի փողոցներում ծածանվել են նաև Իսրայելի դրոշները։

BBC-ի փոխանցմամբ՝ Ադրբեջանի և Թուրքիայի միջև լարվածության դրսևորումներից մեկը նկատվել է ՄԱԿ-ի Գլխավոր ասամբլեայի նիստում, երբ Իսրայելի վարչապետ Բենիամին Նեթանյահուի ելույթի ընթացքում մի շարք երկրների ներկայացուցիչներ լքել են դահլիճը։ Թուրքիայի ներկայացուցիչը հեռացել է, իսկ Ադրբեջանի ներկայացուցիչը մնացել է տեղում։ Նրա լուսանկարը՝ դատարկ նստատեղերի ֆոնին, տարածվել է սոցցանցերում և քննադատության արժանացել թուրքական լրատվամիջոցներում։

Ադրբեջանը միաժամանակ սերտ հարաբերություններ ունի Թուրքիայի և Իսրայելի հետ․ Բաքուն նավթ է վաճառում երկու երկրներին և զենք գնում նրանցից։

Արևելագետ, NEST կենտրոնի փորձագետ Ռուսլան Սուլեյմանովը նշել է, որ Թուրքիայում, հատկապես իսլամիստական շրջանակներում, դժգոհ են Ադրբեջանի և Իսրայելի սերտ կապերից։ Սակայն, նրա խոսքով, դա այն պատճառը չէ, որի համար Անկարան կցանկանա բախվել Բաքվի հետ։ Սուլեյմանովը նաև ընդգծել է, որ Թուրքիան երկիմաստ դիրքորոշում ունի՝ խստորեն քննադատելով Իսրայելի ղեկավարությանը, բայց շարունակելով տնտեսական հարաբերությունները, այդ թվում՝ ադրբեջանական և իրաքյան նավթի տարանցումը։

Աղբյուր՝ 168.am