«Մենք ուտում ենք վատ, չվերահսկվող սնունդ»․ Հարություն Մնացականյան

«Ուժեղ Հայաստան» խմբակցության պատգամավոր Հարություն Մնացականյանը «Ա1+»-ի հետ զրույցում հայտարարել է, որ Հայաստանում գյուղմթերքի արտադրությունը պատշաճ պետական վերահսկողության տակ չէ, ինչի հետևանքով սննդամթերքում թունաքիմիկատների պարունակությունը կարող է գերազանցել թույլատրելի չափը։

Նրա խոսքով՝ գյուղացիական տնտեսություններն ու ֆերմերները թունաքիմիկատներն օգտագործում են իրենց հայեցողությամբ կամ խանութների վաճառողների խորհուրդներով՝ առանց թույլատրելի չափաբաժինները հաշվի առնելու։ «Մենք ուտում ենք վատ սնունդ, մենք ուտում ենք չվերահսկվող սնունդ»,— ասել է պատգամավորը։

Մնացականյանը նշել է, որ ինքն ամբողջ տարվա ընթացքում նախընտրում է ջերմատներում աճեցված բանջարեղենը, քանի որ այնտեղ, իր խոսքով, մասնագետները նյութերն օգտագործում են թույլատրելի սահմաններում։

Անդրադառնալով արտահանման ուղղությունների դիվերսիֆիկացմանը՝ պատգամավորը պնդել է, որ այդ գործընթացում հիմնական դերակատարներն իշխանությունները չեն եղել, այլ տնտեսվարողները։ Նա նաև ասել է, որ իր կապերի միջոցով աջակցել է բազմաթիվ տնտեսվարողների։

Մնացականյանը «մանիպուլյացիա» է որակել էկոնոմիկայի նախարար Գևորգ Պապոյանի հրապարակումները, ըստ որոնց՝ 2026 թ․ հունվար-օգոստոսին Հայաստանի արտահանումը դեպի ԵՄ աճել է շուրջ 70 տոկոսով, դեպի Հնդկաստան՝ 2,1 անգամ, Չինաստան՝ 76 տոկոսով, իսկ ԱՄԷ՝ 45-46 տոկոսով։

Պատգամավորի կարծիքով՝ արտահանման աճը պետք է ներկայացնել ոչ միայն տոկոսային, այլև բացարձակ թվերով։ Նա օրինակ է բերել՝ նշելով, որ եթե արտահանման սկզբնական ծավալը կազմել է 100 հազար դոլար, ապա ևս 60 հազար դոլարի ավելացումը կնշանակի 60 տոկոս աճ։

Աղբյուր՝ aravot.am