Արտաքին աշխարհ
«Կարմիր գիծն այլևս հատված է». Մակրոնը՝ Սիրիայից Ադրբեջան տեղափոխված զինյալների մասին
2020 թվականի Արցախյան պատերազմի ընթացքում միջազգային տարբեր կառույցներ և պաշտոնյաներ հանդես են եկել ռազմական գործողությունները դադարեցնելու, քաղաքացիական բնակչությանը պաշտպանելու և արտաքին ուժերի ներգրավվածությունը կանխելու կոչերով։
Ֆրանսիայի նախագահ Էմանուել Մակրոնը հայտարարել է, որ իր տեղեկություններով՝ Սիրիայից շուրջ 300 գրոհային է տեղափոխվել Բաքու՝ Գազիանթեփով։ Նրա խոսքով՝ այդ անձինք նույնականացված են և Հալեպի շրջանում գործող ջիհադիստական խմբավորումներից են։ Մակրոնը նշել է, որ նմանատիպ այլ խմբավորումներ ևս պատրաստվում են տեղափոխվել, և ընդգծել է. «Կարմիր գիծն այլևս հատվա՛ծ է»։
Ֆրանսիայի արտաքին գործերի նախարար Ժան-Իվ Լը Դրիանը նույնպես հայտարարել է, որ Թուրքիան ռազմական առումով ներգրավված է Լեռնային Ղարաբաղի հակամարտությանը։ Նրա գնահատմամբ՝ այդ հանգամանքը հակամարտության միջազգայնացման վտանգ է ստեղծում։
ՄԱԿ-ի գլխավոր քարտուղարի խոսնակ Ստեֆան Դյուժարիկը հայտնել է, որ գլխավոր քարտուղարը կողմերին կոչ է անում անհապաղ դադարեցնել բոլոր ռազմական գործողությունները։ ՄԱԿ-ի գնահատմամբ՝ ռազմական լուծում չկա, իսկ մարտերի շարունակումը խորացնելու է մարդկային տառապանքները։
ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին և Էնդրյու Շոֆերը դատապարտել են Լեռնային Ղարաբաղում, ինչպես նաև Հայաստանի և Ադրբեջանի տարածքներում շփման գծից հեռու գտնվող թիրախների դեմ շարունակվող բռնությունը։ Նրանք ընդգծել են, որ արտաքին ուժերի մասնակցությունը ուժգնացող բռնությանը խաթարում է տարածաշրջանում կայուն խաղաղության հասնելու ջանքերը։
ԵԱՀԿ Խորհրդարանական վեհաժողովի անդամ Նիկոլո Ինվիդիան անընդունելի է համարել օտարերկրյա վարձկանների ներգրավումն ու քաղաքացիական բնակչության նկատմամբ բռնությունները՝ կոչ անելով վերականգնել հրադադարը և երկխոսությունը։ Իսկ Չիլիի պատգամավորների պալատը բանաձևով դատապարտել է Ադրբեջանի ռազմական ագրեսիան և պահանջել անհապաղ դադարեցնել հարձակումները՝ հակամարտության խաղաղ կարգավորման նպատակով։
Աղբյուր՝ aravot.am
