«COP-17-ը նվիրել Գագիկ Ծառուկյանի՝ սատկած առյուծի հիշատակին»․ Էդգար Ղազարյան

ԱԺ արտահերթ նիստում «Ուժեղ Հայաստան» խմբակցության պատգամավոր Էդգար Ղազարյանը առաջարկել է COP-17 գագաթաժողովը նվիրել Գագիկ Ծառուկյանի՝ «սատկած առյուծի հիշատակին»։

ԱԺ-ն հրատապ կարգով քննարկել է Հայաստանի կառավարության և Կենսաբանական բազմազանության մասին կոնվենցիայի քարտուղարության միջև համաձայնագիրը, որը վերաբերում է կողմերի համաժողովի 17-րդ հանդիպման, Կարթագենյան արձանագրության կողմերի հանդիպման 20-րդ և Նագոյայի արձանագրության կողմերի հանդիպման 6-րդ նիստերի անցկացմանը։

Ղազարյանը հայտարարել է, որ Հայաստանը «բնապահպանական տարրական խնդիրներ չի կարողանում պահպանել», մինչդեռ միջազգային համաժողովի կազմակերպման համար ծախսվում են միլիոնավոր դոլարներ։ Նրա խոսքով՝ «Մերիդիան» համալիրում ժամանակավոր շինություն կառուցելու և այլ աշխատանքների համար պետական միջոցներ են ծախսվել, իսկ համաձայնագրի վավերացման գործընթացը կառավարության «թափթփվածության կենդանի հուշարձանն է»։

Պատգամավորը նաև հարցրել է, թե ինչու է 2025-ին ստորագրված փաստաթուղթը Ազգային ժողով ներկայացվում 2026 թվականի հոկտեմբերին։ Նա մտահոգություն է հայտնել, որ նիստի օրակարգում ներառված երկու հարցեր չեն քննարկվել գլխադասային հանձնաժողովներում, և հարցրել է՝ որն է այդ ընթացակարգի բացառիկությունը։

Ղազարյանը նաև նշել է, որ COP-17-ի անցկացման օրերն արդեն որոշված են, և հարցրել՝ եթե համաձայնագիրը քաղաքական որոշմամբ չվավերացվի, արդյոք համաժողովը չի՞ կազմակերպվի։

Արտաքին գործերի և միջազգային առևտրի նախարարի տեղակալ Ռոբերտ Աբիսողոմոնյանը պարզաբանել է, որ համաձայնագիրը Հայաստանի համար ֆինանսական պարտավորություններ է նախատեսում, ուստի այն ենթակա է Ազգային ժողովի վավերացման և Սահմանադրական դատարանի կողմից սահմանադրականության որոշման։

Ղազարյանը հակադարձել է՝ նշելով, որ ֆինանսների նախարարության տեղեկանքում գրված է, թե համաձայնագիրը պետության համար ֆինանսական պարտավորություն չի առաջացնում։ Նա հարցրել է նաև, թե արդյոք COP-17-ի քարտուղարությանը նախատեսված գումարը փոխանցվել է, քանի որ փաստաթղթով այն պետք է փոխանցված լիներ նիստից 9 ամիս առաջ։

ԱԺ նախագահ Ռուբեն Ռուբինյանը, պատասխանելով գլխադասային հանձնաժողովների նիստերի վերաբերյալ մտահոգությանը, նշել է, որ ԱԺ կանոնակարգ օրենքի 41-րդ հոդվածի 7-րդ կետը սահմանում է այն դեպքերը, երբ արտահերթ նիստում հարցը կարող է քննարկվել առանց գլխադասային հանձնաժողովի նիստի։ Նրա խոսքով՝ տվյալ դեպքում եղել է հրատապության հարց, և վարչապետը ԱԺ նախագահից ստացել է բանավոր համաձայնություն։

Աղբյուր՝ aravot.am