Հասարակություն
«Արմավիր» ՔԿՀ-ում երկու օրում երկու դրոն է հայտնաբերվել՝ հեռախոսներով և սարքավորումներով
ՀՀ արդարադատության նախարարության քրեակատարողական ծառայությունը հայտնել է, որ «Արմավիր» քրեակատարողական հիմնարկում հոկտեմբերի 7-ին և 9-ին անօդաչու թռչող սարքերով արգելված իրերի փոխանցման երկու դեպք է կանխվել։
Հոկտեմբերի 7-ին՝ ժամը 22:20-ի սահմաններում, հիմնարկի պահպանության ապահովման բաժնի ծառայողները նկատել են դրոն, որից հետո տարածքում զննություն է իրականացվել։ Դրոնի հայտնաբերումից բացի, տեղամասի տանիքից հայտնաբերվել են կպչուն ժապավենով իրար ամրացված երկու բջջային հեռախոս։
Եվս մեկ դեպք արձանագրվել է հոկտեմբերի 9-ին՝ ժամը 06:35-ի սահմաններում։ Դրոնը նկատել են հիմնարկի դիտաշտարակներից մեկի պահպանության և արգելագոտում շրջայց իրականացնող անվտանգության ապահովման բաժինների ծառայողները։ Տեղազննության արդյունքում հայտնաբերվել է դրոն, որին ամրացված են եղել չորս բջջային հեռախոս, երկու Wi-Fi սարք և մեկ լիցքավորման սարք։
Աղբյուր՝ aravot.am
