Տնտեսություն
«Իռացիոնալ իշխանական վարքագծի պայմաններում ռացիոնալ սպասումներ պահանջելը տնտեսական քաղաքականություն չէ». Դավիթ Անանյան
Դավիթ Անանյանի գնահատմամբ՝ Հայաստանի ինստիտուցիոնալ կարողությունները չեն համապատասխանում երկրի առջև կանգնած մարտահրավերներին, իսկ իշխանության քաղաքական ու տնտեսական վարքագծի անհետևողականությունը խոչընդոտում է քաղաքացիների և բիզնեսի վստահելի սպասումների ձևավորմանը։
Նա անդրադարձել է 2026 թվականի տնտեսագիտության Նոբելյան մրցանակին, որը շնորհվել է Ռոբերտ Հոլին և Մայքլ Վուդֆորդին՝ մակրոտնտեսական կայունացման միկրոտնտեսական հիմքերի մշակման համար։ Մրցանակակիրների ուսումնասիրությունները վերաբերում են ընտանիքների և ընկերությունների որոշումներին, ապագայի վերաբերյալ սպասումներին ու դրանց ազդեցությանը տնտեսական քաղաքականության արդյունքների վրա։
Անանյանի խոսքով՝ այս թեման Հայաստանի համար ունի գործնական նշանակություն։ Փոքր ներքին շուկա ունեցող երկիրը չի կարող զարգացման հնարավորությունները սահմանափակել միայն ներքին սպառմամբ։ Անհրաժեշտ է զարգացնել բարձրարժեք արտադրությունն ու ծառայությունները, ընդլայնել արտահանումը և բնական ռեսուրսների արդյունահանումից անցնել դրանց վերամշակմանը։ Դրա համար, ըստ նրա, անհրաժեշտ են կրթություն, տեխնոլոգիաներ, ենթակառուցվածքներ և հետևողական պետական քաղաքականություն։
Նա նշել է, որ երկարաժամկետ մտածողությունը պետք է հիմք դառնա ընթացիկ որոշումների համար՝ հստակեցնելով, թե ինչ է Հայաստանը արտադրելու, որ շուկաներում է մրցակցելու, ինչպես է բարձրացնելու արտադրողականությունն ու ստեղծելու ավելի մեծ ավելացված արժեք։
«Գիտական առաջադեմ միտքը գործնական արդյունք է տալիս այնտեղ, որտեղ կան կարողունակ ինստիտուտներ, պատասխանատու որոշումներ և կանխատեսելի կանոններ»,— նշել է Անանյանը՝ հավելելով, որ ռացիոնալ տնտեսական քաղաքականության համար անհրաժեշտ է ռացիոնալ կառավարման միջավայր։
Նրա գնահատմամբ՝ կամայականությունը, կարճաժամկետ քաղաքական հաշվարկը և իրար հակասող որոշումները սահմանափակում են նույնիսկ լավագույն գիտական գործիքների արդյունավետությունը։ «Իռացիոնալ իշխանական վարքագծի պայմաններում քաղաքացիներից ու բիզնեսից ռացիոնալ սպասումներ պահանջելը տնտեսական քաղաքականություն չէ։ Դա սեփական անհետևողականության գինը հասարակության վրա դնել է»,— ասել է նա։
Աղբյուր՝ aravot.am
