Սպորտ
«Հաստատ պատճառներից մեկը ֆուտբոլի ֆեդերացիայի հետ է կապված». Արման Աբելյան
Հենրիխ Մխիթարյանի՝ Հայաստանի ազգային հավաքականից հեռանալու պատճառներից մեկը կարող է կապված լինել Հայաստանի ֆուտբոլի ֆեդերացիայի հետ, կարծում է ֆուտբոլային մեկնաբան Արման Աբելյանը։
Մխիթարյանն իր ինքնակենսագրականում գրել է, որ հավաքականի կազմում իր վերջին խաղը տեղի է ունեցել 2021 թվականի նոյեմբերի 14-ին Երևանում՝ Գերմանիայի դեմ 1:4 հաշվով պարտության ժամանակ։ Ֆուտբոլիստը նշել է, որ որոշման մասին պաշտոնական հայտարարությունից առաջ արդեն զգում էր՝ ժամանակն է ավարտել այդ փուլը, սակայն ամբողջությամբ չի բացահայտել հեռանալու պատճառները։
Մխիթարյանը նաև նշել է, որ հավաքականի կազմում իր խաղային պայմանները վերջին տարիներին փոխվել էին, իսկ 95 հանդիպումներից գրեթե կեսում հանդես է եկել իրեն ոչ այնքան նախընտրելի դիրքում։ Այդուհանդերձ, նա ընդգծել է, որ երբեք չի բողոքել, հպարտությամբ է կրել Հայաստանի մարզաշապիկը և հանդերձարանում չի ունեցել կոնֆլիկտներ թիմակիցների հետ։
Aravot.am-ի հետ զրույցում Արման Աբելյանն ասել է, որ Մխիթարյանը, ամենայն հավանականությամբ, նկատի է ունեցել հենակետային կիսապաշտպանի դիրքում խաղալը, մինչդեռ իր ոճն ավելի հարձակողական է։ Նրա խոսքով՝ ֆուտբոլիստը, չնայած դրան, հարմարվել է իրավիճակին և այդ դիրքում ևս օգնել թիմին։
Աբելյանը տարակուսանք է հայտնել, որ Մխիթարյանը հավաքականից հեռանալուց շուրջ հինգ տարի անց դեռ ամբողջությամբ չի ներկայացրել որոշման պատճառները։ Մեկնաբանի կարծիքով՝ հանրությունը պետք է այդ մասին հստակ տեղեկանա հենց ֆուտբոլիստից, քանի որ բացատրությունները կարող են ազդեցություն ունենալ թե՛ հայկական ֆուտբոլի, թե՛ ֆեդերացիայի վրա։
«Հաստատ պատճառներից մեկը ֆուտբոլի ֆեդերացիայի հետ է կապված»,– ասել է Աբելյանը՝ նշելով, որ Մխիթարյանը 2023 թվականին հրապարակայնորեն աջակցել էր ֆեդերացիայի նախագահի թեկնածու, իր նախկին թիմակից Արաս Օզբիլիսին։ Նրա խոսքով՝ այդ քայլը կարող էր ցույց տալ, որ Մխիթարյանը ցանկանում էր ֆեդերացիայի նախագահի փոփոխություն։
Միաժամանակ Աբելյանը նշել է, որ հավաքականից հեռանալը Մխիթարյանին հնարավորություն է տվել ավելի շատ կենտրոնանալ ակումբային ֆուտբոլի վրա և շարունակել հանդես գալ բարձր մակարդակով։
Աղբյուր՝ aravot.am
