Կորոնավիրուսի դեմ պատվաստանյութը հղիներին վնաս չէ. Անահիտ Ավանեսյան

Կորոնավիրուսի դեմ պատվաստումները չեն կարող ազդել մարդու վերարտադրողական առողջության վրա։ Այս մասին այսօր Ազգային ժողովում հայտարարեց ՀՀ առողջապահության նախարար Անահիտ Ավանեսյանը։

«Այս պահին որևէ գիտական հաստատված փաստ չկա, որ պատվաստումները, մասնավորապես, կորոնավիրուսի դեմ պատվաստումները ազդում են մարդու վերարտադրողական առողջության վրա», –  ասաց Անահիտ Ավանեսյանը։

Նա հավելեց, թե շատ երկրներում հղիները ակտիվ կեպով պատվաստվում են, ու կարդացել է, որ պատվաստանյութի արդյունքում ստեղծված հակամարմինները նաև անցնում են երեխային, այնուհետև իմունիտետային շերտ են ձևավորում։

«Հղիները պատվաստվում են, քանի որ «դելտա» շտամը յուրահատկություն ավելացրեց. եթե նախկինում հղիների մոտ նկատում էինք թեթև ընթացք, ցավոք սրտի, այդ տենդենցը չի պահպանվում, այսօր էլ մեր հիվանդանոցները շարունակում են ընդունել բավական մեծ թվով հղի կանանց, ովքեր ունեն թոքաբորբ ու գրանցեցինք մահ», – հայտարարեց ՀՀ առողջապահության նախարար Անահիտ Ավանեսյանը։

Ըստ Ավանեսյանի, այսօրվա դրությամբ՝ Հայաստանում պատվաստանյութի առաջին դեղաչափ ստացել է 244 հազար 374 քաղաքացի, երկրորդ դեղաչափ ստացել է 133 հազար 31 քաղաքացի։