Գլխավոր դատախազությունն ուսումնասիրում է Հայ Առաքելական Եկեղեցու մասին զեկույցը

Գլխավոր դատախազությունն ուսումնասիրում է «Հայաստանյայց Առաքելական Սուրբ Եկեղեցու փաստացի պետի և մի շարք բարձրաստիճան հոգևորականների գործունեության արդյունքում Եկեղեցում առաջացած ճգնաժամի և լուծման ուղիների մասին» զեկույցը։ Այս մասին «Ազատության» հարցմանն ի պատասխան հայտնել են դատախազությունից։

Մոտ 80 էջանոց փաստաթղթի տեղեկությունների մեծ մասը հիմնված է տարբեր տարիների մամուլի հրապարակումների վրա։ Դրանցում, ըստ հրապարակված տեղեկության, առկա են առերևույթ հանցագործության, այդ թվում՝ մանկապղծության և սեռական անձեռնմխելիության դեմ ուղղված արարքների ենթադրյալ տարրեր։

«Ազատությունը» դատախազությունից հետաքրքրվել է՝ արդյոք ուսումնասիրվել են զեկույցում ներառված այդ հրապարակումները, և դրանց հիման վրա նախաձեռնվե՞լ են քրեական վարույթներ։ Լրատվամիջոցը նաև հարցրել է հնարավոր մեղադրյալների առկայության և նրանց վերագրվող հոդվածների մասին։

Դատախազությունը չի պատասխանել, թե հրապարակումների ուսումնասիրության արդյունքում քրեական վարույթներ նախաձեռնվել են, թե ոչ։ Չի պարզաբանվել նաև, թե եթե դրանք նախկինում չեն ուսումնասիրվել, ապա որն է դրա պատճառը։

Զեկույցը կազմվել է վարչապետ Նիկոլ Փաշինյանի հանձնարարությամբ։ Փաստաթղթում անդրադարձ կա նաև Եկեղեցու ֆինանսական թափանցիկության խնդիրներին։

Մայր Աթոռ Սուրբ Էջմիածինը հայտարարել է, որ կառավարության հրապարակած՝ Հայոց Առաքելական Սուրբ Եկեղեցուն վերաբերող զեկույցը բովանդակությամբ և ձևով հակասահմանադրական, հակականոնական և անօրինական է։

Աղբյուր՝ yerevan.today