Այնթափում վիճաբանությունն ավարտվել է հրազենային վնասվածքով․ 49-ամյա տղամարդը ձերբակալվել է

Հոկտեմբերի 1-ի գիշերը՝ ժամը 03:15-ին, ՆԳՆ 112 օպերատիվ կառավարման կենտրոն տեղեկություն է ստացել, որ «Մասիս» բժշկական կենտրոնի շտապօգնության խումբը հրազենային վնասվածք ստացած 54-ամյա տղամարդու տեղափոխել է «Էրեբունի» բժշկական կենտրոն։

ՆԳՆ-ի հաղորդմամբ՝ Քրեական ոստիկանության Արարատի մարզային վարչության և Համայնքային ոստիկանության Մասիսի բաժնի ծառայողների իրականացրած միջոցառումների արդյունքում պարզվել է, որ նույն գիշերը Այնթափ գյուղի 17-րդ փողոցի տներից մեկի մոտ տղամարդը կենցաղային հարցերի շուրջ վիճաբանել է Նոր Կյուրին գյուղի 49-ամյա բնակչի հետ։ Վիճաբանության ընթացքում նրանք փոխադարձ հարվածներ են հասցրել միմյանց։

Այնուհետև 54-ամյա տղամարդը գնացել է Նոր Կյուրին՝ վիճաբանությունը շարունակելու։ Ըստ հաղորդագրության՝ այդ ընթացքում 49-ամյա տղամարդը իր մոտ ապօրինի պահվող հրացանով կրակել է և մարմնական վնասվածք պատճառել նրան։

49-ամյա տղամարդը հայտնաբերվել, ձերբակալվել և տեղափոխվել է Մասիսի բաժին, ապա՝ ձերբակալվածների պահման վայր։ Դեպքի առթիվ նախաձեռնվել է քրեական վարույթ։ Իրավապահները միջոցառումներ են ձեռնարկում ապօրինի պահվող հրացանը հայտնաբերելու ուղղությամբ, իսկ նախաքննությունը շարունակվում է։

Աղբյուր՝ 168.am