Հայաստանի արտաքին առևտրի բացասական հաշվեկշիռը 8 ամսում անցել է 4 միլիարդ դոլարը

Հայաստանի տնտեսական ակտիվության աճի տեմպը տարվա առաջին 8 ամիսներին դանդաղել է՝ 7 ամսվա 7.7 տոկոսից նվազելով 7.3 տոկոսի։ Նվազման վրա, ըստ ներկայացված վերլուծության, էական ազդեցություն է ունեցել արդյունաբերության ցուցանիշների վատացումը։

Օգոստոսին արդյունաբերական արտադրանքի ծավալը նախորդ տարվա նույն ամսվա համեմատ նվազել է 4.3 տոկոսով։ Չնայած հանքարդյունաբերության աճին՝ մշակող արդյունաբերության մի շարք ուղղություններում արձանագրվել է արտադրության ծավալների կրճատում։ Արդյունաբերության կուտակային աճը, որը որոշ ժամանակ հասել էր 14-15 տոկոսի, վերջին տվյալներով կազմել է 7.4 տոկոս՝ օգոստոսին նվազելով մոտ 2.1 տոկոսային կետով։

Վերլուծության համաձայն՝ արդյունաբերության աճը հիմնականում ապահովվում է ընդերքի շահագործմամբ։ Նույն գործոնը, ըստ նյութի, ազդել է նաև արտաքին առևտրի կառուցվածքի վրա։ Տարվա առաջին 8 ամիսներին հումքային ապրանքների արտահանումը գրեթե կրկնապատկվել է՝ հասնելով 1.3 միլիարդ դոլարի և կազմելով Հայաստանի ընդհանուր արտահանման 27-28 տոկոսը։

Միաժամանակ, ընդհանուր արտահանումը նվազել է 6.5 տոկոսով, իսկ ներմուծումը շարունակել է աճել։ Դրա հետևանքով արտաքին առևտրի բացասական հաշվեկշիռը տարվա առաջին 8 ամիսներին գերազանցել է 4 միլիարդ դոլարը։ Նախորդ տարվա նույն ժամանակահատվածում այն կազմել էր 2.9 միլիարդ դոլար, այսինքն՝ մեկ տարվա ընթացքում ցուցանիշը խորացել է 1.1 միլիարդ դոլարով։

Նյութում նաև անդրադարձ է կատարվում էկոնոմիկայի նախարարի հրապարակած տվյալներին, որոնց համաձայն՝ հունվար-օգոստոսին Եվրամիության երկրներ արտահանումն աճել է 69 տոկոսով, Չինաստան՝ 78 տոկոսով, Հնդկաստան՝ 2.1 անգամ, իսկ ԱՄԷ՝ 48 տոկոսով։ Վերլուծության հեղինակների գնահատմամբ՝ այդ աճերը հիմնականում պայմանավորված են պղնձի, մոլիբդենի, ոսկու և թանկարժեք քարերի արտահանմամբ, ինչպես նաև վերաարտահանման գործարքներով։

Ներկայացված գնահատմամբ՝ ներքին առևտրի աճը մոտ է զրոյականին, իսկ տնտեսական ակտիվությունն առավելապես պահպանվում է շինարարության և ծառայությունների ոլորտների հաշվին։

Աղբյուր՝ 168.am