ՄԻՊ ներկայացուցիչները Շիրակի երեխայի խնամքի կենտրոնում արձանագրել են համակարգային խնդիրներ

Մարդու իրավունքների պաշտպան Անահիտ Մանասյանի հանձնարարությամբ ՄԻՊ ներկայացուցիչները չհայտարարված մշտադիտարկման այց են իրականացրել ՀՀ աշխատանքի և բարեկեցության նախարարության «Շիրակի երեխայի խնամքի կենտրոն» ՊՈԱԿ։

Այցի ընթացքում ուսումնասիրվել են կենտրոնի շենքային և սանիտարահիգիենիկ պայմանները, խնամքի, բժշկական օգնության ու սննդի տրամադրման հարցերը, ինչպես նաև աշխատակազմի և շահառուների միջև հարաբերությունները։ Ուսումնասիրվել են նաև շահառուների իրավունքների ու շահերի պաշտպանության վիճակը և կենտրոնի փաստաթղթերի համապատասխանությունը սահմանված պահանջներին ու չափորոշիչներին։

ՄԻՊ աշխատակազմի ներկայացուցիչների արձանագրած խնդիրները հիմնականում համակարգային բնույթի են։ Դրանք քննարկվել են կենտրոնի տնօրինության հետ։ Խնդիրներն ու դրանց լուծմանն ուղղված առաջարկներն արտացոլող փաստաթուղթը կներկայացվի ոլորտի իրավասու մարմիններին։

ՄԻՊ-ից հայտնում են, որ այցի ընթացքում կենտրոնի տնօրինությունն ու անձնակազմը արդյունավետ համագործակցել են ներկայացուցիչների հետ։ Միաժամանակ ընդգծվել է արձանագրված հարցերի լուծման ուղղությամբ հետագա աշխատանքների շարունակականության կարևորությունը։

Մարդու իրավունքների պաշտպանը, որպես «Հաշմանդամություն ունեցող անձանց իրավունքների մասին» ՄԱԿ-ի կոնվենցիայի դրույթների կիրառության մշտադիտարկում իրականացնող պաշտոնատար անձ, կարևորում է հաշմանդամություն ունեցող անձանց շուրջօրյա խնամքի հաստատությունների ապաինստիտուցիոնալացման ուղղությամբ պետության գործուն քայլերը, կառուցվածքային բարեփոխումները և համակարգված մոտեցումը։

Աղբյուր՝ aravot.am