Հասարակություն
«Հրապարակ». Ադրբեջանցու կրակոցից վիրավորված սյունեցի կնոջը մի քանի վիրահատություն է սպասվում
«Հրապարակ»-ի տեղեկություններով՝ ադրբեջանցու կրակոցից վիրավորված Սյունիքի 38-ամյա բնակչուհու վիճակը ծանր է։ Կինը մի քանի օր է բուժվում «Գրիգոր Լուսավորիչ» բժշկական կենտրոնում, որտեղ նրան երեկ վիրահատել են։ Թերթի փոխանցմամբ՝ նախատեսվում են ևս մի քանի վիրահատություններ՝ նրա ոտքը անդամահատումից փրկելու նպատակով։
Հրապարակման համաձայն՝ կնոջ ոտքը մինչև ծունկը փշրված է, հեռացվել են մեծ քանակությամբ ոսկրային բեկորներ, իսկ բժիշկները քննարկել են ոտքի ոսկրի իմպլանտ տեղադրելու հարցը։ Երեկվա դրությամբ նախատեսված էր երեք վիրահատություն։
«Հրապարակը» նաև գրում է, որ պատկան գերատեսչությունները և «Գրիգոր Լուսավորիչ» բժշկական կենտրոնի տնօրինությունը կնոջ առողջական վիճակի վերաբերյալ լռում են։ Թերթի պնդմամբ՝ իշխանությունը նախ թաքցրել է ադրբեջանցի զինծառայողի ներթափանցումը, իսկ այժմ ներկայացնում է, թե կնոջ կյանքին վտանգ չի սպառնում։
Աղբյուր՝ yerevan.today
