Արտաքին աշխարհ
«Մենք կաթվածահար կանենք ՄՔԴ-ի գործելու ունակությունը». Մարկո Ռուբիո
ԱՄՆ նախագահ Դոնալդ Թրամփի վարչակազմը պատժամիջոցներ է սահմանել Միջազգային քրեական դատարանի (ՄՔԴ) դեմ՝ դատարանի նախկին դատավոր Նավի Փիլային Խաղաղության Նոբելյան մրցանակի շնորհումից ժամեր անց, հաղորդում է Reuters-ը։
Վաշինգտոնը նախկինում արդեն պատժամիջոցներ էր կիրառել ՄՔԴ դատավորների և դատախազների նկատմամբ, իսկ այժմ սահմանափակումների սպառնալիքի տակ է դրել նաև դատարանին ծառայություններ մատուցող ընկերություններին։
ԱՄՆ պաշտոնյաները պահանջում են, որ դատարանը հրաժարվի Իսրայելի ղեկավարների ձերբակալման օրդերներից և դադարեցնի Աֆղանստանում ամերիկյան զորքերի գործողությունների վերաբերյալ նախկինում հարուցված քննությունը։
«Նախագահ Թրամփը երբեք Միջազգային քրեական դատարանին թույլ չի տա հետապնդել ամերիկացիներին»,— հայտարարել է ԱՄՆ պետքարտուղար Մարկո Ռուբիոն՝ ըստ Reuters-ի։ Նրա խոսքով՝ Միացյալ Նահանգները կարգելի գործարքները դատարանի հետ՝ կտրելով դրա ռեսուրսները և կաթվածահար անելով գործելու կարողությունը։
ՄՔԴ դատախազի տեղակալ Նաժաթ Շամիմ Խանը դատապարտել է պատժամիջոցները՝ պնդելով, որ դրանք չեն կանգնեցնի դատարանի աշխատանքը։ «Մեր աշխատանքը շարունակվելու է՝ մեր բոլոր իրավիճակներով, հետաքննություններով և հետապնդումներով»,— Reuters-ին ասել է նա։
Միջազգային քրեական դատարանը հիմնադրվել է 2002 թվականին՝ պատերազմական հանցագործությունները, ցեղասպանություններն ու մարդկության դեմ հանցագործությունները քննելու համար։ ԱՄՆ-ը երբեք չի անդամակցել դատարանին։ Հայաստանը ՄՔԴ-ին միացել է 2024 թվականի փետրվարից։
Աղբյուր՝ aravot.am
