Քաղաքականություն
«Մենք շարունակում ենք հատուկ ռազմական գործողության նպատակների իրականացումը». Սերգեյ Լավրով
Ռուսաստանը չի պատրաստվում հրաժարվել Ուկրաինայում իր ռազմական նպատակներից՝ չնայած ԱՄՆ նախագահ Դոնալդ Թրամփի հայտարարած «էներգետիկ հրադադարին»։ Այդ մասին հայտարարել է Ռուսաստանի արտաքին գործերի նախարար Սերգեյ Լավրովը՝ մեկնաբանելով Ուկրաինայի նախագահ Վլադիմիր Զելենսկու հայտարարությունները հրադադարի վերաբերյալ։
Լավրովի պնդմամբ՝ Զելենսկին փորձում է հրադադարը օգտագործել ժամանակ շահելու, ուժերը վերականգնելու և Արևմուտքից նոր զինատեսակներ ստանալու համար։
«Չեմ կարծում, որ նա արժանի է այդ դադարին։ Չեմ կարծում նաև, որ մենք հերթական անգամ կհավատանք նրա երաշխիքներին ու խոստումներին։ Նախագահ Պուտինը հստակ ասել է՝ մենք շարունակում ենք հատուկ ռազմական գործողության նպատակների իրականացումը։ Մենք երբեք չենք փոխել դրանք»,- ասել է ՌԴ ԱԳ նախարարը։
Հոկտեմբերի 11-ին Դոնալդ Թրամփը հայտարարել էր, որ Ռուսաստանն ու Ուկրաինան համաձայնել են անհապաղ դադարեցնել միմյանց էներգետիկ ենթակառուցվածքների ուղղությամբ հարվածները։ Վարշավայի անվտանգության համաժողովում Զելենսկին հայտնել է, որ Ուկրաինան անմիջապես աջակցել է նախաձեռնությանը, սակայն Ռուսաստանը շարունակել է հարվածները։ Նրա խոսքով՝ Թրամփի հայտարարությունից հետո ռուսական զորքերը հարվածել են Խարկովի էլեկտրակայանին և գազային ենթակառուցվածքի օբյեկտներից մեկին։
Աղբյուր՝ 168.am
