Արտաքին աշխարհ
ԱՄՆ-ն ու Ավստրալիան անվտանգության նկատառումներով փակել են Բրազիլիայում իրենց դիվանագիտական ներկայացուցչությունները
ԱՄՆ-ն անվտանգության սպառնալիքների պատճառով ժամանակավորապես դադարեցրել է Բրազիլիայում իր դեսպանատան և հյուպատոսությունների աշխատանքը՝ նախագահական ընտրությունների առաջին փուլից երկու օր առաջ։ Ավստրալիան ևս փակել է իր դեսպանատունը՝ հղում անելով անվտանգության նկատառումներին, հայտնում է Associated Press-ը։
ԱՄՆ դեսպանատունը հայտնել է, որ ուրբաթ օրվանից ժամանակավորապես դադարեցվում են հյուպատոսական ծառայությունները։ ԱՄՆ քաղաքացիներին հորդորվել է չայցելել դեսպանատուն, հյուպատոսություններ կամ այլ դիվանագիտական օբյեկտներ, իսկ օգնության անհրաժեշտության դեպքում կապ հաստատել հերթապահ աշխատակիցների հետ՝ սահմանված ուղիներով։
ԱՄՆ Պետդեպարտամենտը չի մանրամասնել սպառնալիքների բնույթը և որոշումը ուղղակիորեն չի կապել նախագահական ընտրությունների հետ։ Գերատեսչության ներկայացուցիչը նշել է, որ Վաշինգտոնը համագործակցում է Բրազիլիայի իշխանությունների հետ՝ անվտանգության սպառնալիքները չեզոքացնելու նպատակով։
Նույն օրը Բրազիլիայի ֆեդերալ ոստիկանությունը խուզարկություններ և նյութերի առգրավում է իրականացրել Սան Պաուլոյում և Դաշնային օկրուգում։ Գործողությունն անցկացվել է այն հետաքննության շրջանակում, որը վերաբերում է ամերիկյան դիվանագիտական օբյեկտներին հնարավոր սպառնալիք ներկայացնող ծրագրերին։
Ոստիկանությունը գործողությունն անվանել է կանխարգելիչ և հայտնել, որ այն իրականացվել է օտարերկրյա հետախուզական ծառայությունների հետ համագործակցության արդյունքում։ Միաժամանակ քննիչները նախնական ռիսկերի հաստատումներ չեն գտել և հանցավոր կազմակերպությունների հետ կապ ունեցող կասկածյալներ չեն հայտնաբերել։ Առգրավվել է կապի սարքավորում, իսկ հետաքննությունը շարունակվում է։
Բրազիլիայում Ավստրալիայի դեսպան Սոֆի Դևիսը հայտնել է, որ Ավստրալիայի դեսպանատունը նույնպես փակվել է ուրբաթ օրը։ Նա հղում է արել ԱՄՆ նախազգուշացմանը և Ավստրալիայի քաղաքացիներին խորհուրդ տվել խուսափել Բրազիլիայում ԱՄՆ դեսպանատներից, հյուպատոսություններից և այլ դիվանագիտական օբյեկտներից։
Դիվանագիտական ներկայացուցչությունների փակումը տեղի է ունեցել նախագահական ընտրությունների առաջին փուլի նախօրեին։ Ընտրությունները կայանալու են կիրակի՝ հոկտեմբերի 4-ին։ Նախագահի պաշտոնի համար պայքարում են գործող ղեկավար Լուիս Ինասիու Լուլա դա Սիլվան և նախկին նախագահ Ժաիր Բոլսոնարուի որդին՝ սենատոր Ֆլավիու Բոլսոնարուն։ Եթե թեկնածուներից որևէ մեկը չստանա ձայների ավելի քան 50 տոկոսը, երկրորդ փուլը կանցկացվի հոկտեմբերի 25-ին։
Աղբյուր՝ 168.am
