Երևանում ներկայացվել է ամերիկահայ համայնքի 20-րդ դարի պատմությունը՝ 50 լուսանկարով

Սեպտեմբերի 29-ին Երևանում բացվել է «Տոնելով ժառանգությունը. ամերիկահայ համայնքի կյանքը 20-րդ դարի լուսանկարչական օբյեկտիվում» ցուցադրությունը՝ նվիրված Միացյալ Նահանգների անկախության 250-ամյակին։

Ամերիկայի Հայկական Համագումարի և պատմաբան Հայկ Դեմոյանի համագործակցությամբ կազմակերպված ցուցադրությանը ներկայացված է Դեմոյանի հավաքածուից ընտրված 50 լուսանկար։ Նախաձեռնությանն աջակցել են Հովնանյան ընտանիքի հիմնադրամը և «Դեպի Հայք» ծրագիրը։

Երկու սրահներում ցուցադրված լուսանկարներն անդրադառնում են 20-րդ դարում ամերիկահայերի ընտանիքին, աշխատանքին, համայնքային կյանքին, մշակույթին, գիտությանը, սպորտին և հասարակական գործունեությանը։ Կազմակերպիչների խոսքով՝ 50 լուսանկարների ընտրությունը խորհրդանշական է՝ կապված Միացյալ Նահանգների 50 նահանգների հետ։

Ամերիկայի Հայկական Համագումարի Հայաստանի գրասենյակի տնօրեն Արմեն Սահակյանը նշել է, որ ցուցադրության նպատակն է ներկայացնել ինչպես ամերիկահայ համայնքի ընդհանուր ներդրումը, այնպես էլ առանձին անհատների հաջողության պատմությունները։ Նրա խոսքով՝ նման ծրագրերը շարունակական են լինելու՝ երկու կողմերի փոխադարձ ճանաչողությունը մեծացնելու համար։

Ցուցադրության բացմանը Հայաստանում ԱՄՆ դեսպանության գործերի ժամանակավոր հավատարմատար Դեյվիդ Ալենը կարևորել է երկու երկրների անկախության հոբելյանները և ընդգծել հայերի ազդեցությունը ամերիկյան կյանքի տարբեր ոլորտներում։ Նա նաև պատմել է, որ Հայաստանում է իմացել՝ իր մանկության սիրելի «Alvin and the Chipmunks» մուլտֆիլմի ստեղծողը հայազգի Ռոս Բաղդասարյանն է։

Հայկ Դեմոյանի խոսքով՝ իր հավաքածուն ներառում է ամերիկահայ ժառանգությանը վերաբերող շուրջ 400 նյութ, որոնք նա ձեռք է բերում eBay-ից և տարբեր աճուրդներից։ Պատմաբանը նշել է, որ հայկական հետքը գտնելը հաճախ բարդ է, քանի որ աճուրդներում «հայկական» բառը սովորաբար չի նշվում, և անհրաժեշտ է որոնել ավելի քան 100 հայկական ազգանունների տարբեր ուղղագրություններով։

Դեմոյանը նաև հիշատակել է, որ Ջորջ Վաշինգտոնի մասին առաջին հայկական անդրադարձը եղել է 1773 թվականին Կալկաթայում հրատարակված «Որոգայթ փառաց»-ում։ Նա նշել է, որ ամերիկահայ ժառանգության ուսումնասիրությունն իր համար շարունակական աշխատանք է։ 2018 թվականին Նյու Յորքում հրատարակվել է նրա «Armenian Legacy in America: A 400-Year Heritage» գիրքը, իսկ հավաքածուի նոր նյութերի հիման վրա ապագայում հնարավոր է դրա լրացված տարբերակի պատրաստումը։

Միջոցառման ավարտին Արմեն Սահակյանը Հայկ Դեմոյանի գրքի մակագրված օրինակներ է հանձնել երեկոյի բանախոսներին, այդ թվում՝ Դեյվիդ Ալենին, Հայաստանում Խաղաղության կորպուսի տնօրեն Ուիլյամ Օ’Ռուրկին և Սփյուռքի գործերի գլխավոր հանձնակատարի գրասենյակի հայրենադարձների ինտեգրման վարչության պետ Հովհաննես Ալեքսանյանին։ Դեմոյանին էլ նվիրել են սեպտեմբերի 21-ին Անկախության պատշգամբում ծածանված Հայաստանի Հանրապետության պետական դրոշը։

Դեմոյանը «Առավոտի» հետ զրույցում նաև մտահոգություն է հայտնել ամերիկահայ համայնքի ներկայիս համախմբվածության և ակտիվության վերաբերյալ՝ նշելով, որ համայնքը, իր գնահատմամբ, ծերանում է, իսկ համազգային ծրագրերի իրականացման գործում նկատվում է էներգիայի պակաս։

Ցուցադրությունը այցելուների համար բաց կլինի մինչև հոկտեմբերի 31-ը։

Աղբյուր՝ aravot.am