«Փետրվարից ԵՄ-ում գազի գինն աճել է 140%-ով». Ուրսուլա ֆոն դեր Լայեն

Եվրամիության երկրներում գազի գինը փետրվարից աճել է 140%-ով, հայտարարել է Եվրոպական հանձնաժողովի նախագահ Ուրսուլա ֆոն դեր Լայենը՝ Ստրասբուրգում Եվրախորհրդարանի նիստում։ Նրա ելույթի տեսանյութը տարածել է Եվրոպական հանձնաժողովը։

Ֆոն դեր Լայենի խոսքով՝ 2026 թվականի սկզբից Եվրամիությունը գազի ներկրման համար վճարել է 100 միլիարդ եվրոյով ավելի, քան 2025 թվականին՝ միաժամանակ չներկրելով նախկինից ավելի մեծ ծավալ։

Եվրահանձնաժողովի նախագահը կոչ է արել ավելացնել ներդրումները կանաչ և ատոմային էներգիայի ոլորտներում, ինչպես նաև կրճատել Ռուսաստանից գազի գնումները։ Նրա տվյալներով՝ Ուկրաինայի դեմ պատերազմի ծավալումից առաջ Ռուսաստանին բաժին էր ընկնում ԵՄ գազի ներկրման 45%-ը, իսկ այժմ այդ ցուցանիշը նվազել է մինչև 12%։

Ֆոն դեր Լայենը հայտարարել է, որ Եվրամիությունը մտադիր է Ռուսաստանից գազի ներկրումը զրոյի հասցնել մինչև հաջորդ տարվա վերջը, իսկ սկզբնաղբյուրի համաձայն՝ Ռուսաստանից գազի գնումներից ամբողջությամբ հրաժարվելու նպատակ ունի մինչև 2027 թվականի վերջը։

Նա նաև առաջարկել է ԵՄ երկրների գազի գնումները միավորել և դրանք փոխանցել Եվրոպական հանձնաժողովին կամ դրա վերահսկողության ներքո գործող միասնական եվրոպական շուկայական օպերատորին։ «Մենք պետք է միավորենք գազի պահանջարկը և լիազորենք մեկ շուկայական օպերատորի զբաղվելու բոլոր ընդհանուր գնումներով»,– ասել է Եվրոպական հանձնաժողովի նախագահը։

Աղբյուր՝ 168.am