«Ուղղակի դադարեցրել են բնակարաններից օգտվելու իրավունքը»․ փաստաբան

ՀՀ պաշտպանության նախարարությունը դադարեցրել է մի շարք արցախցի բարձրաստիճան զինծառայողների ծառայողական հիմունքներով հատկացված բնակարաններից օգտվելու իրավունքը։ Փաստաբան Ռոման Երիցյանը Aravot.am-ին հայտնել է, որ ՊՆ բնակկենցաղային հանձնաժողովի վարչական ակտերն արդեն վիճարկվում են դատարանում։

Երիցյանի խոսքով՝ վիճարկվող վարչական ակտերի ընդունումից անցել է ավելի քան 10 տարի, ինչի պատճառով դրանք օրենքի ուժով դարձել են անբողոքարկելի։ Նա նշել է, որ զինծառայողները ժամանակին ստացել են 2-3 սենյականոց բնակարանների օրդերներ, որոնք գործող իրավակարգավորման պայմաններում հետագայում կարող էին փոխարինվել սեփականության իրավունքի վկայականով։ Բնակարանները հատկացվել էին այն հիմքով, որ զինծառայողները բնակարանով ապահովված չեն և ունեն բնակարանային պայմանների բարելավման կարիք։

Փաստաբանի տեղեկացմամբ՝ բնակարանների շուրջ վեճը սկսվել է այս տարվա ամռանը, երբ ՊՆ-ն համապատասխան դիմումներով պահանջել է արցախցիներից ազատել իրենց հատկացված բնակարանները։ Նա ընդգծել է, որ խոսքը նաև այն մարդկանց մասին է, որոնք Հայաստանում այդ բնակարաններից բացի այլ կեցավայր չունեն։ Երիցյանի փոխանցմամբ՝ նրանցից մեկի բնակարանում ապրում է չորս մանկահասակ երեխա։

Դատարանը, ըստ փաստաբանի, հայցի ապահովման միջոց է կիրառել և ՊՆ-ին պարտավորեցրել որևէ գործողություն չձեռնարկել մինչև վերջնական դատական ակտի կայացումն ու դրա օրինական ուժի մեջ մտնելը։

Երիցյանը պնդում է, որ բնակարաններից օգտվելու իրավունքը օրենքով սահմանված կարգով դադարեցված չէ, իսկ ՊՆ-ն իր որոշումներում որևէ իրավական նորմ չի վկայակոչել՝ նշելով միայն դատախազության միջնորդագիրը։ «Իրենք ուղղակի դադարեցրել են արցախցիներին օրդերով տրամադրված օգտագործման այդ իրավունքը»,– ասել է նա։

Փաստաբանի խոսքով՝ այս փուլում դատարանում քննարկվում է ոչ թե բնակարանների սեփականության իրավունքի հաստատումը, այլ օգտագործման իրավունքի դադարեցման հարցը։ Նա վստահություն է հայտնել, որ դատարանը հայցերը կբավարարի՝ նշելով, որ բնակկենցաղային հանձնաժողովը նման վարչական ակտ ընդունելու իրավասություն չունի։

Աղբյուր՝ aravot.am